O alumnado do CEIP Nosa Señora da Piedade asistirá a esta actividade organizada en colaboración con Polo Correo do Vento co gallo das Letras Galegas
Organizaranse ata 35 citas destes obradoiros nos próximos meses ao longo de todo o territorio provincial
A Deputación de Pontevedra inicia este mércores 21 de maio a xeira de contacontos ‘Cantareiras, poesía popular nas Letras Galegas’ organizada en colaboración coa compañía Polo Correo do Vento co gallo das Letras Galegas. A primeira quenda será en Vila de Cruces, co alumnado co CEIP Nosa Señora da Piedade ás 12:00 horas e organizaranse ata 35 citas destes obradoiros nos próximos meses e ao longo de todo o territorio provincial.
A Deputación ofrece de balde aos concellos da provincia esta actividade co fin de divulgar entre a infancia o papel fundamental das cantareiras para a conservación e difusión da lingua galega. Neles, percorrerase a biografía destas mulleres (personificadas nalgunhas figuras como as de Adolfina e Rosa Casás Rama, de Cerceda, Eva Castiñeira Santos, de Muxía, e Manuela Lema e mais Prudencia e Asunción Garrido Ameixenda, integrantes das Pandeireteiras de Mens, de Malpica) dun xeito ameno e participativo. Ademais, elaborarán un debuxo mural en directo e interpretarán as pezas que cantaban estas mulleres, ademais de pezas propias de cada unha das localidades onde se desenvolvan as accións. Os contacontos rematarán cun obradoiro de debuxo no que os nenos e nenas terán que debuxar unha caricatura dunha pandeireteira.
Ata a data xa está confirmada a chegada desta actividade a Cerdedo-Cotobade, o 13 de xuño ás 12:30 horas no CEIP de Tenorio e, o mesmo día, a Tomiño, onde se poderá desfrutar ás 19:00 horas na Praza do Seixo. O 9 de xullo chegará ao Porriño, ás 10:30 horas na Praza Arquitecto Antonio Palacios. E o 22 de xullo será a quenda de Moraña, ás 12:00 horas no Edificio Multiúsos.
