- O director xeral de Emerxencias e Interior, Santiago Villanueva, presidiu hoxe a reunión do comité asesor do Sapraga
- O Plan estará vixente do 1 de xuño ata o 30 de setembro e a adhesión ten carácter voluntario para os concellos con augas de baño censadas no Servizo Galego de Saúde
- Incorpóranse dúas novas zonas de baño, situadas nos concellos de Laza e Agolada
- No encontro abordouse a orde de axudas da Xunta de 1,5M€ para financiar os custos salariais dos concellos na contratación de persoal de socorrismo na época estival
O director xeral de Emerxencias e Interior, Santiago Villanueva, presidiu hoxe o comité asesor do Plan de Protección Civil de Salvamento nas Praias de Galicia (Sapraga), ao que tamén asistiu a directora xeral de Administración Local, Natalia Prieto. Esta reunión é previa ao comezo da campaña, de maneira que o plan estará operativo do 1 de xuño ao 30 de setembro. Neste período levase a cabo a incorporación paulatina dos servizos públicos de salvamento en praias e o desenvolvemento das funcións previstas no Sapraga e nos plans de prevención e seguridade en praias. Unha vez que o plan xa non estea operativo, prevese para outubro celebrar outro encontro de seguimento para avaliar o plan e dar conta das praias adheridas e as incidencias atendidas, así como a inclusión de melloras que redunden na seguridade da poboación.
Con este plan preténdese garantir a cobertura das emerxencias nas zonas de baño, establecendo os procedementos de comunicación e coordinación cos servizos de emerxencias de Galicia no caso de emerxencias extraordinarias. Na actualización deste ano integráronse dúas novas áreas de baño, situadas nos concellos de Laza e Agolada.
O Sapraga actívase con carácter estacional durante a época estival e, tendo en conta o marco competencial en materia de praias, a adhesión ten carácter voluntario para os concellos que teñan augas de baño censadas no Servizo Galego de Saúde (Sergas). Poden adherirse cantas praias estean no censo, debendo contar con servizo de socorrismo e Plan de prevención e seguridade. En total, hai censados máis de 500 praias, das que 183 son de afluencia masiva, 143 de afluencia moderada e os 143 restantes, de baixa afluencia.
Plan sectorial preventivo e operativo
A través deste plan sectorial de carácter preventivo e operativo, atenderanse as emerxencias ordinarias no espazo das praias. En caso de emerxencia extraordinaria, a proposta do 112 Galicia, e previa valoración do risco pola Axencia Galega de Emerxencias (Axega) e o director xeral de Emerxencias e Interior, activarase o Plan Territorial de Emerxencias de Galicia (Platerga) no nivel que corresponda, activando os grupos operativos que sexan necesarios e quedando nese momento integrado o Servizo Público de Prevención e Socorrismo da Praia no grupo de intervención do Platerga.
O Sapraga está dirixido polo director xeral de Emerxencias e Interior, coa misión de asegurar o bo funcionamento do plan, o seguimento e avaliación das actuacións, e garantir a integración no Platerga e o enlace cos plans de contaminación mariña e o de Salvamento Marítimo.
Orde axudas socorrismo
Cómpre lembrar que formar parte do Sapraga é un dos criterios que se ten en conta na concesión da orde de axudas para a prestación do servizo de vixilancia, rescate e salvamento nos espazos acuáticos naturais e instalacións acuáticas descubertas. Ademais, segundo a convocatoria, tamén se ten en conta o número de zonas de baño inscritas no rexistro, a poboación da entidade local, o número de bandeiras azuis concedidas e contar con declaración de municipio turístico galego.
No comité asesor de hoxe tamén se abordou precisamente esta orde, dotada con 1,5 millóns de euros, co obxectivo de subvencionar os custos salariais entre o 1 de xuño e o 30 de setembro de 2025 do persoal dedicado a estes servizos por parte de concellos e, como novidade nesta convocatoria, de mancomunidades de municipios que presten o servizo de forma conxunta.
A diferencia de convocatorias anteriores nas que se esixía ao persoal estar en situación de desemprego e figurar no Servizo Público de Emprego, o ano pasado xa se ampliara a cobertura a outros dous supostos que se manteñen na orde deste exercicio, isto é, persoal propio da entidade local destinado a este servizo como ao persoal que o concello contrata para estas tarefas a través dunha empresa externa.
Pese a que a contratación de socorristas é un asunto de competencia estritamente municipal, a Xunta ademais de fomentala a través de axudas tamén regula a formación que deben reunir. As persoas que poden exercer esta actividade nas praias e piscinas da comunidade deben estar dados de alta no Rexistro Profesional de Socorristas Acuáticos de Galicia, no que actualmente constan 4.500 profesionais inscritos.
