A vicepresidenta da Deputación de Pontevedra, Luisa Sánchez, reuniuse este mércores na sede de Vigo coas directivas das asociacións de mulleres que participan no programa provincial +Xuntas, nun encontro no que tamén estivo presente a deputada de Igualdade, Sandra Bastos. Esta toma de contacto, que se está levando a cabo coas asociacións de toda a provincia, ten como obxectivo lembrar a dinámica do programa e as obrigas tanto da Deputación como das entidades á hora de participar, ademais de permitir que os colectivos trasladen ao goberno provincial as súas impresións e propostas de mellora.
+Xuntas busca potenciar a participación e a promoción das mulleres, así como favorecer as relacións interpersoais igualitarias, a través de accións formativas que incorporan de maneira transversal os principios de igualdade, corresponsabilidade e conciliación da vida persoal, laboral e familiar. +Xuntas tamén ten como obxectivo mellorar a formación básica das mulleres, o intercambio de experiencias, e contribuír a mellorar a empregabilidade e o seu mantemento no mercado de traballo, reducindo a fenda de xénero mediante a utilización das novas tecnoloxías. O programa ten un orzamento de 325.000 euros e conta este ano coa participación de máis de 5.000 mulleres e 207 entidades de 56 concellos da provincia.
