Os clubs deportivos da provincia que participan en competicións de piragüismo, remo e vela teñen de prazo ata o 5 de xuño para presentar as súas solicitudes
A Deputación de Pontevedra mantén aberto ata o próximo xoves a liña de axudas para os clubs náuticos da provincia de piragüismo, vela e remo neste 2025, dotadas con 550.000 euros, 50.000 euros máis que no 2024. Os clubs teñen de prazo ata o 5 de xuño para presentar a solicitude para optar a estas axudas cuxas bases poden consultarse no Boletín Oficial da Provincia de Pontevedra (BOPPO).
En concreto, estas achegas buscan apoiar aos clubs deportivos sen ánimo de lucro da provincia que participen en competición oficiais de calquera ámbito territorial no piragüismo, o remo e a vela. O obxectivo é reforzar a estrutura, consolidar a traxectoria e promover a continuidade da actividade destes clubs, referentes do deporte galego e estatal. En canto ao reparto do orzamento, a entidades de piragüismo destínanse 305.000 euros, 155.000 euros ás de remo e 90.000 euros a clubs de vela.
Esta liña de axudas concederase en réxime de concorrencia competitiva, e cada club poderá recibir un máximo de 25.000 euros, sempre que non supere o 40% do orzamento presentado. Entre os gastos que poden subvencionar os clubs atópanse os gastos federativos, os de competición e adestramento, os de persoal, de material deportivo ou sanitarios.
