A Biblioteca Pública Municipal María Magdalena acolleu esta tarde a presentación oficial de Noa e a cidade sen maxia, a obra coa que a autora e veciña de Cela Angie Roa resultou gañadora do VI Premio de Banda Deseñada O Garaxe Hermético. O acto contou coa presenza da alcaldesa de Mos, Nidia Arévalo, quen quixo acompañar a autora neste momento tan especial e expresar o apoio institucional á creación cultural local.
Durante a presentación, Nidia Arévalo destacou “o orgullo que supón para Mos contar cunha creadora tan talentosa como Angie Roa, referente da nova xeración da banda deseñada galega”. A rexedora puxo en valor tamén “o traballo, a orixinalidade e a frescura dunha obra que está a recibir o recoñecemento unánime da crítica profesional”.
Noa e a cidade sen maxia, publicada por Edicións Xerais, é unha historia de fantasía e aventuras que destaca polo seu deseño de personaxes, o uso expresivo da cor e unha estética próxima ao webtoon coreano, ademais dun enfoque narrativo contemporáneo que foi eloxiado por profesionais do sector. O xurado do certame estivo composto por Kiko da Silva, Miguel Porto, Fernando Llor e Fernando Iglesias, que valoraron moi positivamente o potencial creativo da autora.
Angie Roa agradeceu a asistencia do público e das autoridades, e compartiu coas persoas asistentes o proceso de creación da obra, así como a súa ilusión por formar parte do panorama galego da banda deseñada.
Con actos como este, o Concello de Mos reafirma o seu compromiso coa promoción da cultura, o apoio á mocidade creadora e o impulso da lingua galega desde o ámbito artístico.
