O Concello de Mos celebra a sinatura do convenio de colaboración coa Consellería de Cultura, Lingua e Xuventude da Xunta de Galicia para continuar coa posta en valor da Antiga Casa Reitoral de Petelos. Esta nova fase do proxecto contará cun investimento de 200.000 euros repartidos entre os anos 2025 e 2026, e permitirá avanzar na recuperación dun dos bens patrimoniais máis singulares do municipio.
O inmoble, datado do século XV, está protexido polo seu alto valor histórico e cultural, formando parte do catálogo autonómico do patrimonio pola consideración de BIC (Ben de Interese Cultural). Ademais, é un dos dous únicos edificios deste estilo que se conservan no municipio.
Esta actuación súmase ás fases anteriores desenvolvidas polo Concello de Mos e a Diócese Tui-Vigo, co apoio da Xunta, nas que xa se executaron obras de consolidación estrutural, mellora da cuberta, renovación de carpinterías e recuperación de espazos interiores. Tamén se traballou na rehabilitación parcial da zona dos xardíns e en intervencións no muro exterior.
Neste primeiro chanzo da terceira e definitiva fase da remodelación da Antiga Casa Reitoral de Petelos, as obras centraranse na limpeza, saneamento e reconstrución dos muros perimetrais, así como na mellora dos accesos e na creación dun paso peonil que conecte cos futuros aparcadoiros e zonas axardinadas, que se acometerán na fase final do proxecto xunto coa rehabilitación do pombal.
Tamén se renovarán elementos da carpintería para mellorar as condicións de protección do interior do edificio; instalaranse portas de madeira maciza, cancelas, varandas metálicas e un sistema de iluminación exterior integrado no pavimento, aproveitando os traballos no perímetro da reitoral.
O Concello de Mos traballa no impulso e posta en valor deste emblemático edificio, para o que está a elaborar un Plan de Usos, que establecerá o xeito no que o tecido asociativo mosense ou outras entidades non lucrativas poderán facer uso da instalación ou para a organización de eventos culturais e sociais por parte do propio Concello de Mos ou das entidades parroquiais.
