A campaña turística da provincia de Pontevedra acadou un novo recoñecemento internacional que se suma aos xa recibidos no International Tourism Film Festival Africa e no Japan World´s Tourism Film Festival
A Deputación de Pontevedra acaba de gañar un novo galardón internacional polo audiovisual da campaña Cando volves? estreada a comezos de ano e por vez primeira en Pontevedra e presentada internacionalmente na feira FITUR de Madrid. Neste caso trátase da prata no US International Awards de Los Ángeles, California, Estados Unidos de América, e súmase á tamén prata alcanzada no International Tourism Festival Africa e ao galardón de ouro obtido no Japan World´s Tourism Film Festival.
A institución provincial logrou posicionar en Los Ángeles o seu vídeo Cando volves? como un dos mellores audiovisuais de turismo do mundo, competindo con destinos como Alemaña, Estados Unidos, Portugal, Francia, Austria, Filipinas, Suíza, Croacia, Xapón ou Hungría. O US International Awards celébrase desde 1967 e enmárcase no Comité Internacional de Festivais de Cine Turístico (CIFFT), que reúne aos festivais máis destacados do mundo dedicados ao cinema turístico.
Cando volves? é unha peza audiovisual na que os lugares do interior da provincia teñen todo o protagonismo, dentro dunha campaña onde tamén se fala da hospitalidade e o carácter acolledor da xente da provincia. A Deputación escolleu este ano o interior de Pontevedra debido a que queda moito da provincia por descubrir, para así convidar a xente a achegarse en diferentes ocasións ao longo de todo o ano, tendo tamén en conta que a desestacionalización é un dos obxectivos principais do goberno da Deputación no marco da súa estratexia turística.
