• Impulsa melloras nas liñas de bus coa Coruña e obtén o compromiso do alcalde de Arteixo de abrir unha nova estrada en Montegolf que acurtará o roteiro do 24 e permitiría habilitar outra parada en Vallesur-As Oliveiras
• Izaskun García, portavoz do Partido Popular: “Mentres o alcalde limítase a asistir a reunións ás que está obrigado a ir, nós si escoitamos aos veciños e conseguimos resultados”
Este martes celebrouse unha reunión da comisión de seguimento do Plan de Transporte Metropolitano coa directora xeral de Mobilidade, Judit Fontela, e a delegada da Xunta na Coruña, Belén do Campo, na que participaron representantes de 16 municipios da comarca coruñesa, entre eles Culleredo. Durante o encontro, Fontela comprometeuse a manter unha próxima reunión específica cos concellos máis próximos da área metropolitana para abordar melloras no servizo de bus coa cidade herculina. Desde o PP de Culleredo aclárase que este encontro foi solicitado pola Coruña e Oleiros, non polo goberno local de Rioboo, que unha vez máis demostra a súa falta de iniciativa e a súa ausencia total de traballo para conseguir avances reais no transporte público e a mobilidade do municipio. “O alcalde súmase agora ás reivindicacións, cando o PP leva meses traballando sobre o terreo, reuníndose con veciños e trasladando as súas demandas ás administracións con capacidade real de actuar”, explica a portavoz popular, Izaskun García.
Froito dese traballo constante, o mes pasado representantes do PP de Culleredo e veciños das urbanizacións Vallesur-As Oliveiras, na parroquia de Orro, mantiveron unha reunión coa directora territorial da Consellería de Presidencia, Mar Ferreiro. Nela solicitaron unha nova parada con dúas frecuencias na liña Canzobre-A Coruña e unha revisión dos horarios da liña 24 para adaptalos mellor ás necesidades da zona. Estas peticións xa están sobre a mesa da Xunta e tamén da Compañía de Tranvías.
Ademais, os populares lograron o compromiso do alcalde de Arteixo, Carlos Calvelo, para abrir unha nova estrada na urbanización Montegolf, como parte das obras da segunda fase desta urbanización de Arteixo, que acurtará o percorrido da liña 24 de bus e beneficiará directamente aos veciños de Vallesur-As Oliveiras. Esta actuación, prevista para principios de 2026, tamén podería facilitar a habilitación dunha nova parada. “Isto demostra que, con diálogo e vontade, entre administracións pódense lograr avances reais. Mentres o alcalde limítase a asistir a reunións ás que está obrigado a ir, por compromiso, nós si escoitamos aos veciños, actuamos con responsabilidade e conseguimos resultados”, engade Izaskun García.
