- Os traballos, cun investimento de máis de 550.000€, céntranse en reparar as patoloxías producidas polo paso do tempo na cuberta da ábsida e nas fachadas
- O representante da Consellería de Cultura salienta “o compromiso coa conservación do patrimonio da cidade, preservando a riqueza cultural en toda Galicia”
A Xunta de Galicia finalizará o vindeiro mes de agosto as obras que está a realizar na basílica de Santa María a Maior de Pontevedra co obxectivo de arranxar as pataloxías rexistradas polo paso do tempo na cuberta da ábsida e nas fachadas. Así o anunciou hoxe o director xeral de Patrimonio Cultural, Ángel Miramontes, na visita que realizou hoxe a este templo xunto co delegado territoral da Xunta, Agustín Reguera, onde confirmou que a intervención, cun investimento do Goberno galego de máis de 550.000€, sobrepasa xa o 90% da execución.
Neste senso, o representante da Consellería de Cultura, Lingua e Xuventude, resaltou o “total compromiso que temos coa restauración e conservación dos bens patrimoniais que atesoura esta cidade, igual que facemos por toda Galicia preservando a nosa riqueza cultural”. Así, lembrou que en Pontevedra “tamén temos outras intervencións activas na liña de manter nas mellores condicións monumentos como o Santuario da Virxe da Peregrina”.
Deste xeito, explicou, os traballos enfocáronse na renovación da cuberta da ábsida e da vertente anexa á nave sur con placas de fibrocemento e tella cerámica, resolvendo tamén os sistemas de evacuación e mellorando a seguridade do paso das escaleiras de acceso ás cubertas. Ademais, con respecto ás fachadas, contemplouse un picado superficial de xuntas de morteiro de cemento e posterior encintado mediante morteiro de cal e unha limpeza dos muros de pedra con tratamento herbicida e funxicida. Así mesmo, a fachada occidental de Cornelius de Holanda dotouse dun sistema de protección que minimice a presenza de aves que poidan afectar a súa conservación, coa posibilidade de eliminar os morteiros de cemento existentes tras as imaxes.
Trátase dun proxecto co que a Consellería de Cultura, Lingua e Xuventude responde ás necesidades que presentaba a basílica e que completa as actuacións que xa se levaron a cabo actuacións no bienio 2020-2021 por valor de máis de 330.000€, levando o investimento por parte da Xunta a máis de 880.000€. Entón xa se interveu na substitución da cuberta da nave central e lateral e na estabilización das vidreiras. Na actualidade o templo seguía a presentar danos que tiñan que ver con zonas nas que non se actuara e que presentaban as mesmas deficiencias resoltas nas devanditas naves.
Así, as principais alteracións detectadas ao longo de toda a superficie das fachadas sur, oeste e ábsida consistían en descamacións, despracamentos e arenización, fisuras, gretas, costras negras, oxidacións, presenza de sales e morteiros de cemento, roturas e colonización biolóxica.
