Intervirán o deputado no Congreso Néstor Rego, a deputada no Parlamento Montse Prado e o portavoz municipal Anselmo Noia
O BNG comezará este sábado a festexar o Día da Patria Galega cunha xornada de reivindicación política con participación de distintos representantes nacionalistas baixo o lema ‘Galiza sempre! Unha nación en marcha pola súa soberanía’. Esta xornada das nacionalistas en Ogrobe forma parte da campaña do Bloque en todo o país na que haberá un cento de repartos informativos e ruadas que concluirán, como xa é tradición, na grande manifestación polas rúas de Santiago de Compostela o 25 de xullo.
Dende o BNG de Ogrobe convidan á participación da militancia e simpatizantes para celebrar “o orgullo de ser galegas e galegos e de reivindicar a construción dun futuro mellor para Galiza”. O acto do sábado será na Rúa Hospital e comezará ás oito da tarde.En caso de mal tempo trasladarase a Casa da cultura Manuel Lueiro Rey.
As intervencións políticas correrán a cargo de figuras relevantes da formación nacionalista, coma o deputado no Congreso Néstor Rego, a deputada no Parlamento Montse Prado e o portavoz municipal Anselmo Noia. Para completar a xornada haberá unha actuación musical de Xosé Constenla e uns petiscos no kiosko ‘O Moscón’.
O voceiro Anselmo Noia explica que o BNG organiza este acto en Ogrobe con motivo do Día da Patria por ser non só unha data no calendario, senón unha mobilización e unha expresión de vontade do pobo para avanzar cara un marco político no que Galiza poida exercer plenamente os seus dereitos e aplicar políticas propias ao servizo das maiorías sociais. Subliña o nacionalista que, neste ano Castelao, e baixo un lema que homenaxea e recolle o seu legado (Galiza sempre!), o Bloque quere reivindicar a súa figura e o seu pensamento “como guía na defensa dos dereitos nacionais e sociais do pobo galego”.
As integrantes do BNG en Ogrobe, ademais de á participación no acto adiantado do sábado, animan tamén á veciñanza a participar de maneira masiva o 25 de xullo na manifestación de Santiago de Compostela que sairá da Alameda ás 12 do mediodía.
