As achegas, que se poden solicitar ata o 30 de setembro, permitirán ás entidades financiar gastos de persoal, de material ou de reparación e conservación dos seus locais
O deputado Jorge Cubela visitou a Banda de Música Unión Musical de Tenorio e deu conta de que na contorna de Pontevedra ata cinco entidades de Barro, Cerdedo-Cotobade, Pontevedra e Vilaboa recibiron nestes dous anos de mandato preto de 28.200 euros desta liña de axudas provincial
A Deputación de Pontevedra acaba de poñer en marcha a nova convocatoria da liña de axudas de apoio ás escolas de música xestionadas por asociacións sen ánimo de lucro da provincia que neste 2025 ascende a 120.000 €, un 20% máis que no 2024. Así o notificou o deputado de Cultura, Jorge Cubela, na visita realizada á Banda de Música Unión Musical de Tenorio, onde deu conta de que na contorna de Pontevedra foron cinco as entidades de Barro, Cerdedo-Cotobade, Pontevedra e Vilaboa que recibiron nestes dous primeiros anos de mandato preto de 28.200 euros desta liña de axudas provincial.
As axudas, que teñen aberto o prazo de solicitude ata o 30 de setembro, permitirán ás escolas financiar gastos de persoal, de material de oficina e de subministracións, actuacións de reparación e conservación dos seus locais ou de instrumentos, as primas de seguros, servizos de asesoría ou xestoría e tamén gastos de prevención de riscos ou recoñecemento médico. As subvencións outorgaranse en réxime de concorrencia competitiva e teranse en conta criterios como o número de alumnos, o número de docentes, o orzamento de gastos da escola ou as especialidades impartidas.
O goberno de Luis López dirixiu nos últimos dous anos 190.000 euros ás escolas de música dependentes de asociacións sen ánimo de lucro da provincia. En concreto, na contorna de Pontevedra, as axudas ascenderon a preto de 28.200 euros e beneficiaron á Asociación Cultura e Xuventude de Barro, con máis de 4.600 euros; a Banda de Música Unión Musical de Tenorio (Cerdedo-Cotobade), con máis de 5.700 euros; a Asociación Cultural A Tempo Escola de Música (Pontevedra), con preto de 2.300 euros; a Asociación Músico Cultural San Martiño de Salcedo (Pontevedra), con preto de 7.200 euros; e a Asociación Cultural e Musical Escola de Música de Vilaboa, con preto de 8.400 euros.
A Deputación pon en marcha estas axudas tendo en conta que as escolas de música da provincia eríxense como dinamizadoras culturais e constitúen para o alumnado (en especial para o de idades temperás) o primeiro contacto con profesionais do eido educativo musical, que lle transmiten coñecementos e valores culturais, fomentan a práctica da música como afección ou maior dedicación e supoñen un elemento dinamizador na contorna social na que se sitúan. O goberno provincial incrementa o crédito das axudas co obxectivo de promover o labor das escolas de música na difusión e na valorización do patrimonio cultural inmaterial na sociedade, nos que a infancia e a xuventude ocuparán un lugar relevante.
