A Asociación Solidaria Mos Axuda logrou reunir un total de 2.900 quilos de alimentos durante a súa campaña solidaria de verán, que xa están a ser distribuídos entre 66 familias do municipio. En total, benefícianse 148 persoas, das cales 35 son menores.
A xornada principal de recollida tivo lugar o 5 de xullo nos supermercados Eroski, Gadis e Alcampo de Mos, cunha ampla mobilización de persoas voluntarias que colaboraron ao longo de todo o día, entre as 10:00 e as 20:00 horas. Nesa xornada recolléronse máis de 1.200 quilos de alimentos non perecedoiros e, a maiores, o supermercado Alcampo de Mos fixo unha doazón de 216 litros de leite.
Ademais, unha empresa mosense, que prefire manter o anonimato, realizou unha importante achega de preto de 900 quilos adicionais de produtos básicos como aceite, azucre, fariña, tomate frito, leite e incluso ovos.
Parte do material foi entregado ás familias o 22 de xullo, e está previsto continuar coas entregas o 29 de xullo. Esta axuda distribúese a través do rexistro de vulnerabilidade social co que traballa a asociación, en colaboración co Departamento de Servizos Sociais do Concello de Mos.
Desde Mos Axuda agradecen profundamente a solidariedade das persoas colaboradoras, así como o labor de todo o voluntariado que, de forma desinteresada, fixo posible esta campaña.
Tralo mes de agosto, Mos Axuda, que opera dende 2015 pero que está constituída como asociación dende o 2023, retomará a actividade xa pensando na campaña de Nadal. Ademais de alimentos non perecedoiros tamén recollen roupa, xoguetes, libros usados, produtos de hixiene, carriños e cadeiras de bebé e ata mobles.
