O xoven palista de 17 anos, que representará a España no Mundial de Hungría, foi homenaxeado no salón de plenos do Concello
Vilaboa, xullo 2025.- O salón de plenos do Concello de Vilaboa vestiuse de gala nunha recepción oficial ao deportista Alexandre Míguez Cores, de tan só 17 anos e palista do Club Piragüismo Vilaboa, foi recibido con todas as honras tras proclamarse campión de España na modalidade K1 júnior de piragüismo de maratón o pasado fin de semana en Pontesampaio.
O alcalde, César Poza, destacou durante a recepción que “Alexandre non só puxo o nome de Vilaboa no mais alto do deporte nacional, senón que nos representa a toda a poboación galega co seu esforzo, humildade e talento”. Un talento que, como recordou o rexedor, comezou a forxarse cando o xoven tiña apenas sete anos e deu as súas primeiras paladas nas augas da ría.
Un palmarés de campión
A vitoria de Alexandre no Campionato de España de Maratón de Verán non é casualidade. O seu impresionante palmarés dos últimos anos fala por si só:
En 2025: Campión de España de Maratón de verán K1 júnior, dobre campión galego no Sprint Xunta de Galicia (K2 mixto júnior 500m e K1 júnior 1000m), e terceiro na I Copa de España de Sprint Olímpico K1 júnior 1000m.
En 2024: Campión de España por Autonomías K1 cadete A 500m e K4 cadete 500m coa Selección galega, campión de España de Ríos K1 cadete, primeiro na Copa de España Maratón K1 cadete, e vitorias en prestixiosas regatas internacionais como a XXX Baixada Internacional do Río Umia.
En 2023: Campión de España de Maratón K1 cadete, campión galego de ríos K1 cadete, e múltiples podios en regatas internacionais como o Descenso Internacional Río Miño de Tui, a Baixada Internacional do Eume ou o Descenso Internacional Río Sil.
“Velo crecer desde neno e saber que agora vai representar a España nun Mundial é algo que nos enche de orgullo”, confesaban técnicos do Club Piragüismo Vilaboa presentes no acto.
Destino: Hungría
Este triunfo ten un sabor especial, xa que garante a Míguez Cores a súa participación no Campionato do Mundo de Maratón de Piragüismo que se celebrará en Győr (Hungría), onde competirá tanto en distancia curta como longa representando as cores de España.
“Alexandre é o exemplo perfecto de que co traballo, constancia e o apoio adecuado, os soños pódense facer realidade”, subliñou o alcalde, quen aproveitou para recoñecer tamén a labor do Club Piragüismo Vilaboa e de todos os técnicos que acompañaron ao xoven deportista na súa meteórica carreira.
O éxito de Alexandre enmárcase ademais no excelente momento que atravesa o Club Piragüismo Vilaboa, cuxos palistas asinaron unha brillante actuación colectiva no pasado Campionato de España de Maratón, confirmando que a canteira vilaboesa é unha das máis potentes de Galicia.
A recepción concluíu coa entrega dunha placa conmemorativa e o compromiso do Concello de seguir apoiando tanto a Alexandre na súa carreira cara á elite internacional como ao conxunto do deporte local, “porque investir en deporte é investir en futuro”, como destacou César Poza.
