- A escultura, un escudo de España, foi realizada por persoal do centro e está elaborada en granito do país e pesa uns 1.000 quilogramos
- O centro oferta catro titulacións de alta especialización deseñadas en colaboración co tecido produtivo, aínda con prazas libres
O conselleiro de Educación, Ciencia, Universidades e Formación Profesional, Román Rodríguez, e o xeneral Alfonso Pardo de Santayana Galbis, participaron hoxe na inauguración dun escudo de España cedido polo Centro Integrado de FP Cantería de Galicia á Brigada de Infantería Aerotransportable (BRILAT). Ao acto asistiron tamén a directora xeral de FP, Eugenia Pérez, e outros representantes educativos e mandos da BRILAT.
A peza, que se colocou nas instalacións desta unidade de elite do Exército de Terra de España na Base General Morillo de Vilaboa (Pontevedra), está realizada en granito do país (procedente de Outeiro de Rei, Lugo) e ten unhas dimensións de 1,5m x 1m e un peso duns 1.000 quilogramos.
No marco da súa visita, o conselleiro coñeceu tamén os diferentes programas formativos que se desenvolven na Brilat, así como os servizos educativos e de conciliación que ofertan nas súas instalacións.
Oferta formativa de calidade
O titular do departamento educativo da Xunta subliñou o traballo que se realiza no CIFP Cantería de Galicia, ao que se está a dar visibilidade a través de diferentes exposicións e cesións de pezas, a última delas a escultura da Virxe do Carmen colocada no porto pesqueiro do Berbés, en Vigo.
O centro oferta para o vindeiro curso 2025/26 catro titulacións de alta especialización cun total de 96 prazas, en concreto os ciclos en Pedra Natural, FP Básica en Reforma e Mantemento de Edificios e FP Dual Intensiva nas especialidades de Construción, Proxectos de Edificación e o novo Ciclo Medio de Escavacións e Sondaxes Dual Intensivo.
Román Rodríguez destacou a calidade desta formación, con itinerarios deseñados en coordinación co sector produtivo para dar resposta a perfís técnicos moi demandados polas empresas e mellorar así a empregabilidade do alumnado e animou a matricularse nestes ciclos, nos que aínda quedan prazas libres para comezar no mes de setembro.
