Quinkillada actuará na Praza da Igrexa ás 21:00 horas
+Música está dotado este ano de 700.000 €, 100.000 € máis que o pasado ano, para colaborar cos concellos na súa programación cultural e difundir e fomentar a lingua e cultura galegas
A Deputación de Pontevedra leva este venres 18 de xullo a Lalín un concerto de Quinkillada, enmarcado na nova edición de +Música, o programa provincial para apoiar a programación cultural dos concellos de menos de 50.000 habitantes da provincia e difundir e fomentar a lingua e a cultura galegas. A actuación terá lugar na Praza da Igrexa ás 21:00 horas.
Quinkillada está integrada por Rodri Martínez, Yago Oliveira, Suso PF, Byktor G, Daniel Acuña e Valverde que forman esta banda que naceu como resposta artística ao encerro en pandemia. Mestura ritmos latinos con rumba, cumbia e sons modernos. No 2022 veu a luz o seu primeiro traballo “Gozar, sentir, bailar”, con dez cortes maioritariamente en galego con gran diversidade nas letras que sonarán en Lalín.
O concerto de Quinkillada é unha das 78 actuacións de +Música que se celebrarán entre os meses de maio e decembro nos 59 concellos de menos de 50.000 habitantes da provincia. Este programa provincial ten un orzamento de 700.000 euros, 100.000 euros máis que na pasada edición, cos que a Deputación aboa os custos de caché dos espectáculos e impulsa a reputación de Pontevedra como un destino cultural de primeiro nivel. A través de +Música, a institución provincial aposta pola descentralización da cultura e a programación de actos culturais de calidade.
