“Trátase dun proxecto arqueolóxico completo que é preciso poñer en marcha para poder afrontar a rehabilitación integral de Santa Clara”, subliñou o presidente
“Seguimos a traballar sen descanso para que a rehabilitación integral de Santa Clara sexa unha realidade canto antes e se converta nun lugar para o desfrute da cidadanía de Pontevedra e da provincia”, remarcou Luis López
A Deputación de Pontevedra acaba de aprobar o expediente de contratación, mediante procedemento aberto, do servizo de escavación arqueolóxica do convento de Santa Clara, por importe de máis de 386.000 euros. O presidente provincial, Luis López, destacou que “trátase dun proxecto arqueolóxico completo que é preciso poñer en marcha para poder afrontar a rehabilitación integral de Santa Clara”.
O proxecto de escavación arqueolóxica no convento de Santa Clara executarase en tres fases. Unha primeira, na que a empresa que resulte adxudicataria deberá remitir o proxecto en 15 días desde a data de formalización do contrato; unha segunda na que se executarán os traballos arqueolóxicos; e unha terceira para a redacción dos informes e as memorias de actuación.
“Seguimos a traballar sen descanso para que a rehabilitación integral de Santa Clara sexa unha realidade canto antes e se converta nun lugar para o desfrute da cidadanía de Pontevedra e da provincia”, subliñou o presidente da Deputación Luis López quen situou esta actuación como “un proxecto estratéxico e clave para o conxunto da provincia”.
