O portavoz do BNG sinala que Ángeles Tilve leva á fronte da institución dende setembro de 2023 a pesares de que a Lei de Emprego Público de Galicia limita a un máximo de 6 meses as funcións de carácter temporal
O portavoz provincial do BNG, César Mosquera, esixiu hoxe á Deputación que resolva inmediatamente a situación de ilegalidade na que está a Dirección do Museo. O nacionalista sinala que Ángeles Tilve leva á fronte da institución dende setembro de 2023, contravindo a Lei de Emprego Público de Galicia que limita a un máximo de seis meses as funcións de carácter temporal. “Hai unha situación manifestamente irregular”, advirte o voceiro.
Mosquera lembrou que a actual responsable do Museo foi nomeada oficialmente en Pleno o 29 de setembro de 2023 por un prazo de tres meses. Entón, o responsable do Bloque xa indicara que ao non ter a praza en propiedade e ser nomeada de maneira provisional e a dedo -sen ter pasado por un concurso público por concorrencia competitiva e ser outras as súas funcións-, Tilve ía estar nunha situación precaria. Así mesmo, destacara que ía carecer de autonomía e de capacidade para tomar decisións xa que, realmente, quen quería exercer de director ‘de feito’ era o propio vicepresidente Domínguez.
Para intentar xustificar a situación, o voceiro do PP Jorge Cubela, anunciara ese mesmo día que a Dirección do Museo ía cubrirse por medio do procedemento regulamentario nun breve espazo de tempo. Con todo, o goberno provincial non fixo apenas movementos para modificar a situación: só fixo unha nova atribución temporal de funcións para Tilve a principios de xaneiro de 2024. Nin houbo novas atribucións temporais nin tampouco ningunha convocatoria de procesos de selección para cubrir a praza de maneira definitiva.
Ante isto, Mosquera asegura que a situación actual é “manifestamente ilegal”. Subliña que a lei 2/2015 de Emprego Público de Galicia, no seu artigo 37.2 di expresamente que as e os empregados públicos poden asumir funcións, tarefas ou responsabilidades distintas ás correspondentes ao seu posto de traballo “sempre que as necesidades do servizo o xustifiquen”, con carácter temporal, “polo tempo imprescindible e, en todo caso, por un período máximo de seis meses”.
Mosquera sinala que “non é de recibo” que o actual goberno da Deputación utilice fórmulas provisionais par eludir procesos regulamentarios. Destaca que a xustificación que deu Domínguez de que a posta en marcha da Bienal retrasou os trámites “cae polo seu propio peso” xa que van alá máis case dous anos dende o seu nomeamento.
O nacionalista destaca que nestes momentos o Museo ten moitos proxectos en marcha (reforma de edificios centrais, ampliación con Santa Clara e outros) que poden verse afectados pola falta de estabilidade institucional na Dirección. “Hai claros riscos organizativos e operativos, é preciso convocar o procedemento regulado que anunciaron hai 22 meses e do que nada se sabe”, subliña.
“As andaduras de Domínguez”
O Pleno da Deputación foi escenario de diferentes enfrontamentos dialécticos entre o Bloque e o Partido Popular, que por voz do vicepresidente Domínguez, subiron a un ton irrespectuoso incluso a nivel persoal cara as e os integrantes da oposición.
Tras escoitar como Domínguez lle acusaba de “estar flojo”, de “tener hecho ya sus 100 mejores discursos”, e de precisar unhas vacacións, Mosquera agradeceu ironicamente a preocupación do ‘popular’ pola súa saúde e manifestou a súa dúbida sobre se estaba a vivir un episodio de edadismo “meténdose coa xente maior”.
Toda vez que o presidente Luís Lopez tamén tomou a palabra para destacar que Domínguez fora respectuoso, Mosquera convidou ao mandatario provincial que “tomase distancia” con respecto das andaduras do seu vicepresidente, xa que este “perturba bastante” o funcionamento e o diálogo na institución. O voceiro do BNG insistiu así na mesma liña que hai meses, cando instara a López a apartar a Domínguez das súas responsabilidades no Museo e a Santa Clara se quería que as reformas de ambos inmobles saísen adiante.
O ton despectivo de Domínguez xurdiu principalmente no debate sobre a dragaxe no Lérez. Nese punto Mosquera subliñou que o BNG está a favor do dragado, mais destacou que é necesario que os lodos se traten en terra por ter unha grande contaminación. Subliñou que o problema polo que non se levan adiante os traballos é de tipo económico, xa que trasladalos a calquera punto no mar é dez veces máis barato que tratalos en terra “e a Xunta o que quere é facelo baratillo”.
O voceiro do Bloque subliñou que hai coñecemento de que os lodos teñen grande contaminación de metais pesados. “Traia un informe que diga que son residuos inocuos. Dubido que o haxa e que o poida haber. Hai normativas que cumprir e a nosa opción, creo que é a única realista, é que veñan e se traten en terra”, indicou, lamentando as palabras de Domínguez, que cualificou os requirimentos ambientais para facer a dragaxe de “cosas ecologistas”.
