“Rogelio III. La fête”, de AsSircópatas en coprodución coa Mostra Internacional de Teatro Cómico e Festivo de Cangas, representarase ás 20:30 horas na Praza Massó
+Escénicas é o circuíto da institución provincial que leva unha completa programación de teatro e danza aos concellos de menos de 20.000 habitantes
A Deputación de Pontevedra leva este martes 5 de agosto o circuíto +Escénicas ao concello de Bueu da man do espectáculo de ‘clown’ para todos os públicos “Rogelio III. La fête”, a cargo da compañía AsSircópatas en coprodución coa Mostra Internacional de Teatro Cómico e Festivo de Cangas. Trátase dunha actuación enmarcada na segunda edición desta iniciativa provincial, que apoia a programación de teatro e danza nos concellos de menos de 20.000 habitantes da provincia cun orzamento de 195.000 euros, 45.000 euros máis que na súa primeira convocatoria.
“Rogelio III. La fête” é a terceira parte dunha triloxía protagonizada por esta personaxe interpretada polo actor Dani Blanco. Representarase na Praza Massó ás 20:30 horas e desenvólvese arredor da idea de que acontecería se ninguén asistise á nosa festa de aniversario e ninguén nos cantase os parabéns. Neste espectáculo combina circo, clown, corda frouxa, malabares e música con moito humor, e foi finalista á mellor proposta para público familiar nos Premios María Casares 2025.
Co circuíto +Escénicas, a Deputación dá resposta á demanda que o sector profesional vén facendo desde fai máis de 15 anos. Tralo éxito da primeira edición, entre abril de 2025 e marzo de 2026 representaranse un total de 136 funcións, escollidas entre un catálogo de espectáculos dispoñible no sitio web da Deputación de Pontevedra, en 50 concellos da provincia de Pontevedra.
