O xoves rematou a II SEMANA GRANDE de SOUTOMAIOR coa Romaría de San Caetán na Ermida situada no Castelo de Soutomaior. Dende o concello destacan a alta participación nesta festas “necesarias” para Soutomaior. Unhas festas que tal e como confirma o alcalde “chegaron para quedarse”.
7 días de festa na celebración da II Semana Grande de Soutomaior que deron o seu pistoletazo de saída o 1 de agosto co “chupinazo” e que remataron o xoves coa Romaría de San Caetán, na ermida que leva este mesmo nome situada no Castelo de Soutomaior.
Foron 7 días onde se lle rendeu tributo á música, a gastronomía local, ao comercio pero, sobre todo, onde o principal obxectivo, tal e como hoxe dixo o alcalde , Manu Lourenzo, está, un ano máis cumprido que é o de “facer pobo, facer veciñanza e conseguir que as veciñas e veciños de Soutomaior se sintan, se cabe, máis orgullosos dos seu concello”.
Co resultado destas festas Manu Lourenzo xa anuncia “dende o Goberno Local xa estamos traballando na programación do vindeiro ano, que estarán á altura do desta edición e sempre tomando nota dos erros e tamén dos acertos desta II edición e escoitando a mensaxe que nos traslada a veciñanza, que na súa maior parte son mostras de agradecemento por recuperar unhas festas de unión e de celebración dun pobo”.
Unhas festas polas que pasaron a Mekánica Rolling Band, as orquestras Panorama, Combo Dominicano, América de Vigo e a Gran Parada que encheron o torreiro da festa en Candán, grupos tradicionais como Aires da Castrelada ou Catro Ventos, tamén contou co directo da Banda Artística de Arcade e coa actuación do Trío Azabache e de Demasiadas sombras y pocas luces.
Un dos seus días grandes foi o 3 de agosto, xornada onde se lle rendeu homenaxe a cociñeiras e cociñeiros que levaron e levan a gastronomía de Soutomaior por todo o mundo. Un día onde algúns destes conciñeiros realizaron un showcooking onde protagonizado por Joaquín Lema, Victor Luís Martínez Reguera, José Ramón Vaqueiro Cima, Serafín Álvarez, Antón Fontela, Jesús Falcón e Casimiro Cernadas quenes fixeron a elaboración de exquisitos petiscos que se degustaron de balde: figo con queixo e anchoa, lacón sobre lámina de pataca aliñada á feira, lasca de bacallau con lactonesa de allo e pataca e rolo de salmón afumado e queixo. Nesta xornada tamén tivo lugar o II XANTAR POPULAR realizado na Carballeira e ao que asistiron máis de 200 persoas que, tralo xantar, puideron desfrutar e bailar da música en directo do Trío Azavache.
Outro dos días destacados é o 6 de agosto, día do Patrón, onde as veciñas e veciños de Soutomaior puideron desfrutar da música da Banda Artística de Arcade e da tradicional procesión, un feito singular onde todos os barrios xuntan as súas figuras nun rito de fondo arraigo en Soutomaior. Trátase dun feito que ademais de relixioso ten un importante valor social e cultural.
E para rematar a festa chegou coa Romaría de San Caetán, celebrada na xornada do xoves, coa que se puxo punto e final á celebración desta II Semana Grande.
O alcalde, Manu Lourenzo, quixo agradecer ao operativo especial de seguridade conformado pola Policía Local, Garda Civil, Emerxencias e Protección Civil que ao longo destes días estiveron traballando nas celebración da II Semana Grande de Soutomaior “grazas pola vosa adicación e esforzo e permitirnos desfrutar desta Semana Grande nun ambiente seguro e festivo”.
Foron sete días de compartir, facer pobo, facer veciñanza, días de reencontros, de baile e onde reinaron o bo ambiente e as ganas de pasalo ben.
