Os interesados deben inscribirse en www.carreirasgalegas.com antes do 20 de agosto ás 23:59 horas
O Concello de Nigrán organiza o sábado 23 de agosto unha das súas cita deportivas máis emblemáticas do verán: a XIV edición da ‘Nigrán Area’, carreira popular de atletismo pola praia de Panxón e Praia América. O prazo de inscrición está aberto en www.carreirasgalegas.com e finaliza o 20 de agosto ás 23:59 horas. O evento foi presentado esta mañá polo alcalde e concelleiros coa presenza de atletas de diferentes clubes.
“Trátase dunha carreira única pola contorna natural do litoral nigranés aproveitando a marea baixa, e que pretende fomentar o deporte, o respecto polo medio e a convivencia veciñal”, explica Juan González, alcalde do Concello de Nigrán, administración que asume a totalidade da organización. Este evento convoca a persoas corredoras de todas as idades, reunindo a máis de 3.000 persoas entre atletas, acompañantes e público.
A cita deportiva arranca ás 11:00 horas na categoría absoluta (5 km) e está aberto a tódalas categorías, tendo saída desde Panxón. Os sub 16 percorrerán 2 km, o sub 14 farán 1500 m, os sub 12 un km, os sub 10 percorrerán 500 metros, os sub 8 farán 300 metros e os máis pequenos farán 100 metros. A proba conta coa supervisión da Federación Galega de Atletismo.
Os dorsais serán entregados polo Concello o día anterior á proba no Pavillón Municipal de Panxón, situado na Avda de Gondomar, 2, en horario de 16:30 a 20:30 horas, e o mesmo día na propia praia de Panxón, a partir das 09:00 horas da mañá e ata 30 min antes.
