A acción, enmarcada no plan de marketing dos castelos baixo o lema “Só faltas ti”, busca promover o turismo interior e convertelos nun referente do patrimonio cultural de Galicia
O vicepresidente da Deputación de Pontevedra, Rafa Domínguez, deu conta este venres da aprobación en Xunta de Goberno da contratación dun stand con información sobre os castelos de Soutomaior e Sobroso nas festas de interese turístico da provincia de Pontevedra. Como asegurou o vicepresidente, trátase dunha medida “contemplada no plan estratéxico de marketing dos castelos, que ten en conta que estas festas son un importante reclamo polo importante número de persoas que asisten a estes eventos”, co obxectivo de “converter Soutomaior e Sobroso nun referente no ámbito do patrimonio cultural e medioambiental de Galicia”.
O posto informativo está identificado co lema da campaña “Só faltas ti” con presenza en nove festas de interese turístico desenvolvidas ao longo de todo o ano 2025: a Festa do Cocido (Lalín), a Arribada (Baiona), a Lamprea (Arbo), o Corpus Christi (Ponteareas), a Rapa das Bestas de Sabucedo (A Estrada), a Festa do Albariño (Cambados), a Festa da Empanada da Bandeira (Silleda), a Feira Franca (Pontevedra) e a Festa do Marisco (O Grove). O contrato inclúe o deseño, produción, transporte, montaxe, desmontaxe, almacenamento, mantemento e contratación do persoal de atención ao público coa posibilidade de prorrogalo durante outros tres anos, co que o investimento global sería de arredor de 106.000 euros.
Rafa Domínguez salientou que “con esta acción seguimos dando pasos para a promoción dos recursos patrimoniais da provincia de Pontevedra, unha provincia con moita historia e un referente no turismo cultural, como tamén demostran fitos como as excelentes cifras acadadas pola Bienal de Pontevedra no ecuador da mostra”. En canto aos castelos, o vicepresidente da Deputación aproveitou para celebrar “as cifras de visitantes destes castelos no primeiro semestre do ano, con ese 38% máis de visitas en Soutomaior que o ano anterior, con preto de 15.000 visitas, e as 6.500 visitas de Sobroso”.
