Os case 400 senegaleses que viven en Ourense convidan a veciñanza a compartir hoxe a súa celebración, con música, eventos e comida típica
O alcalde de Ourense, Gonzalo Pérez Jácome, e a concelleira de Artes e Festexos, Noa Rouco, visitaron esta mañá a festa que a comunidade de senegaleses e senegalesas que residen na cidade celebra durante todo o día de hoxe no Campo da Feira. O Concello colabora con este tradicional encontro da comunidade senegalesa de Ourense, ao igual que o fai cos colectivos de veciñas e veciños procedentes doutros países: Colombia, Venezuela…
Durante todo o día, os case 400 senegaleses que viven en Ourense convidan a veciñanza a compartir a súa celebración, na que haberá música, eventos e comida típica. “Hoxe é un día moi especial para nós xa que celebramos a Magal Touba, que se chama así porque a celebración principal ten lugar na cidade senegalesa de Touba”, afirma Talla, un dos organizadores. A festividade realízase a nivel mundial na honra de Cheikh Ahmadou Bamba, teólogo musulmán de Senegal.
