“Brincadeiras da lingua”, de Migallas Teatro, representarase ás 19:00 horas na Rúa Oriente
+Escénicas é o circuíto da institución provincial que leva unha completa programación de teatro e danza aos concellos de menos de 20.000 habitantes
A Deputación de Pontevedra leva este venres 15 de agosto o circuíto +Escénicas ao concello da Cañiza da man do espectáculo infantil “Brincadeiras da lingua”, a cargo de Migallas Teatro. Trátase dunha actuación enmarcada na segunda edición desta iniciativa provincial, que apoia a programación de teatro e danza nos concellos de menos de 20.000 habitantes da provincia cun orzamento de 195.000 euros, 45.000 euros máis que na súa primeira convocatoria.
“Brincadeiras da lingua” representarase na Rúa Oriente ás 19:00 horas e ten por finalidade promover o uso e a transmisión da lingua no ámbito familiar. A través de xogos verbais participativos, cancións, contos, monicreques e outros recursos, a compañía pontevedresa ofrecerá na Cañiza unha escolma de ditos infantís tradicionais.
Co circuíto +Escénicas, a Deputación dá resposta á demanda que o sector profesional vén facendo desde fai máis de 15 anos. Tralo éxito da primeira edición, entre abril de 2025 e marzo de 2026 representaranse un total de 136 funcións, escollidas entre un catálogo de espectáculos dispoñible no sitio web da Deputación de Pontevedra, en 50 concellos da provincia de Pontevedra.
