Ao longo de toda a xornada do 16 de agosto, o Peirao de Arcade acolleu a segunda edición de “A Recalada, encontro do mar”. Unha cita que un ano máis, plasmou o seu compromiso co patrimonio marítimo galego facendo fincapé na relación que ten Arcade e Soutomaior co mar.
A tradición mariñeira do concello de Soutomaior vén de lonxe, séculos de historia patentes a través dun xeito de vida que, aínda que algo modificado, chega ata os nosos días, e que se pode apreciar, a través da rica gastronomía da zona e da vinculación que a economía local ten co mar, xa ben sexa a través da gastronomía ou a través do desenvolvemento das artes de pesca e dos oficios do mar.
Durante a xornada do 16 de agosto houbo no Peirao de Arcade actividades moi variadas relacionadas co mar, o turismo sostible, as artes de pesca, a artesanía local, a gastronomía, a música popular nunha ampla programación que contará con navegacións, concertos, exposicións, animación na rúa, artesanía, exposicións, obradoiros e actividades para a cativada e para todas as idades.
Unha xornada onde xogou un papel moi importante a colaboración de entidades como Culturmar, o Clube náutico de Arcade, a Confraría de Arcade, a asociación de mariscadoras, a Asociación de baile e a música tradicional galega (AGG) ou a de colectivos como os de artesanía e comercio local, entre outros moitos.
Unha cita que contou co izado das velas, un dos momentos máis fermosos e agardados da xornada, cunha feira de artesanía local, cunha mostra de instrumentos tradicionais, coa zona gastro- Navy Bar, con obradoiros para toda a familia vencellados co baile, música e tradición, coa sesión vermú a cargo de “Abeleiras de Alxán” e “Chispas do Lérez”, con visitas guiadas ás embarcacóns e co concerto a noitiña dos “Carunchos” e a celebración dun fin de festa por todo o alto cunha “Fiada”.
A navegación e degustación a bordo do “Balardo de Santa Cruz” e os paseos en caiac, únicas actividades para as que se precisaba inscricións previa, foron todo un éxito e a xente amosouse “encantada” de poder coñecer, descubrir e percorrer nosa fermosa ría a través destes medios.
Unha Recalda que un ano máis deixou pegada e deixou patente que este II encontro do mar chegou para quedarse.
Ao longo de toda a xornada pasaron polo Peirao de Arcade centos de veciñas e veciños do concello e tamén xente de concellos limítrofes e turistas que aproveitaron a ocasión para descubrir e coñecer o encanto e fermosura da nosa ría.
