· “Levamos anos pedindo un aumento de liñas e frecuencias para os estudantes das etapas post-obrigatorias que aínda non se produciu”, salienta Sandra Insua.
· Critica que “a falta de opcións de transporte adecuado leva ao illamento da nosa vila e fomenta o uso do vehículo particular”.
· Sinala que “a escasos 9 quilómetros de Camariñas, en Lexas, pasa un bus que podería ser unha alternativa para os nosos estudantes”.
O Concello de Camariñas enviou un escrito á Consellería de Educación, Ciencia, Universidades e Formación Profesional da Xunta de Galicia solicitando unha serie de melloras no servizo de transporte escolar para o municipio, incluíndo entre estas a gratuidade dos desprazamentos para o alumnado de bacharelato.
No texto, asinado pola alcaldesa, Sandra Insua, lémbrase que “levamos anos pedindo un aumento de liñas e frecuencias para os estudantes das etapas post-obrigatorias, que aínda non se produciu”. “No ano 2022 presentamos unha moción onde instábamos á Xunta a modificar a xestión do transporte escolar e a establecer a gratuidade para o alumnado de bacharelato”, explica.
“O alumnado de bacharelato de Camariñas que se despraza ao IES de Vimianzo séntese discriminado xa que os estudantes vimianceses teñen o autobús gratuíto ao poder aproveitar o servizo da ESO mentres que os de Camariñas teñen que pagar uns 85 euros ao mes, o que supón 170 euros mensuais no caso de ter dous fillos ou fillas”, salienta a rexedora, que sinala que “a escasos 9 quilómetros de Camariñas, en Lexas, pasa un bus que podería ser unha alternativa para os nosos estudantes”.
Ademais, critica que “a falta de opcións de transporte adecuado leva ao illamento da nosa vila e fomenta o uso do vehículo particular, o que ten consecuencias negativas para a seguridade viaria e a contaminación ambiental, ademais de xerar un gran sobrecusto económico e un esforzo persoal para as familias”.
Ante esta situación, o Concello demanda que “se garanta o servizo de transporte escolar público para facilitar o acceso ao sistema educativo público ao alumnado de todas as etapas, tanto obrigatorias como non obrigatorias; revisar e modificar os horarios e liñas de transporte para adaptalos aos horarios lectivos máis comúns do estudantado das parroquias do Concello de Camariñas que o precise; e establecer a gratuidade do transporte para o alumnado de bacharelato xa que o seu pagamento supón unha medida discriminatoria economicamente entre os menores de idade”.
