Ante o mes practicamente inhábil que resulta o mes de agosto, Ricardo Martínez, solicita ao Goberno que sexa sensible con esta circunstancia para facilitar que a veciñanza defenda os seus dereitos
O alcalde de Portas, Ricardo Martínez, solicitoulle á Dirección Xeral de Carreteras, do Ministerio de Transports e Mobilidade Sostible do Goberno de España que amplíe o prazo de presentación de alegacións ao estudio informativo da “Carretera N-640. Variante Oeste de Caldas de Reis y acceso al puerto de Vilagarcía de Arousa” (EI2-PO-0029)” que remata o vindeiro 1 de setembro.
Ricardo Martínez argumenta que o mes de agosto é practicamente inhábil desde o punto de vista das empresas especializadas ás que se pode recurrir para preparar en condicións técnicas unhas alegacións a este estudio que pretende, en 3 das súas 4 propostas, que a Variante de Caldas de Reis discurra polo termo municipal de Portas cos prexuizos e problemas que iso pode ocasionar á veciñanza deste concello.
“Se o Ministerio pretende que se teñan en conta os dereitos da veciñanza de Portas afectada por esta proposta de Variante deberían facilitar ao máximo que os veciños, as empresas e o propio Concello poidan presentar dun xeito sosegado, con tempo e con garantías de transparencia e eficacia técnica nas argumentacións das posibles alegacións que se presenten. Polo tanto, fai falta tempo e todo o mundo sabe que agosto é un mes moi malo para iso. As empresas asesoras e técnicas non están operativas e moitos veciños incluso se atopan fóra, de vacacións”, indicou Martínez.
“Solicitamos máis tempo porque o estudio que se propón é extremadamente sensible aos nosos intereses e en moitos casos resulta moi prexudicial para o futuro desenrolo do noso municipio polo que hai que ser moi coidadosos e debemos facilitar que todos os puntos de vista se poidan manifestar, estudiar e presentar en condicións polo que unha ampliación do prazo sería unha medida xusta e necesaria”, afirmou o alcalde de Portas.
ESFORZO INTENSO PARA INFORMAR Á VECIÑANZA
Pola súa banda, o alcalde de Portas, Ricardo Martínez, lembrou que desde o Concello se promoveu a celebración de xuntanzas informativas cos veciños e mesmo se enviou unha carta a todos os veciños e veciñas do municipio para que puideran ser coñecedores das intencións do Ministerio de Transportes e Mobilidade facilitando incluso modelos básicos de alegacións para que aqueles veciños que se consideraran afectados por este estudio puideran presentalas no Rexistro do Concello o na sede electrónica do Ministerio, dirixidas á Demarcación de Carreteras del Estado en Galicia.
“Aínda así, somos conscientes de que esa información está sendo analizada agora pola veciñanza e precisa dun tempo necesario para asesorarse e presentar as alegacións que estime oportunas porque vense afectados moitos intereses veciñais particulares, empresariais e incluso de futuro para o noso concello polo que o xusto sería que se ampliara o prazo xa que o 1 de setembro está á volta da esquina e non hai tempo material para acompañar esas alegacións do soporte técnico necesario para mellorar a súa argumentación”, concluiu Ricardo Martínez.
