Rosa Cedrón será a encargada de abrir o festival que terá lugar o domingo 7 de setembro a partir das 19:15 horas.
O alcalde de Campo Lameiro e membros do equipo de Goberno presentaron a XIV Festa d@s Moz@s que terá lugar o domingo 7 de setembro na Praza do Concello e no que se darán cita Milladoiro, tras 44 anos da súa última estancia, Luar na Lubre, que estivo xa hai 33 anos, e Rosa Cedrón que será a encargada de abrir o festival ás 19:15 horas.
O mítico grupo Milladoiro volverá á Festa d@s Moz@s de Campo Lameiro despois de 44 anos da súa última estancia neste festival e farao con temas de entón e novos traballos da súa xira deste ano. A actuación está previsto que comece sobre as 20 horas cun repertorio que combinará a raíz celta da súa música con sonoridades contemporáneas, nun espectáculo pensado para todos os públicos.
Co seu inconfundible son —no que conviven gaitas, frautas, cordas e percusión— Milladoiro ofrecerá un percorrido polos temas máis recoñecidos da súa traxectoria xunto con pezas do seu repertorio recente. O concerto está concibido para un formato familiar e de proximidade, poñendo en valor a música galega e a vivencia colectiva do directo.
Milladoiro é unha referencia internacional da música galega de raíz. Coidando tanto a investigación do patrimonio musical como a creación propia, a banda consolidou un estilo recoñecible que proxecta o folk galego no mundo a través de composicións instrumentais e arranxos de gran riqueza melódica.
Previamente á actuación de Milladoiro, será a cantante Rosa Cedrón, ex compoñente de Luar na Lubre, quen abra a Festa d@s Moz@s ás 19:15 horas cun concerto marcado por un ambiente íntimo e próximo, convidando ao público a gozar da forza e da sensibilidade dunha das voces máis recoñecidas da música galega actual.
No escenario, Rosa Cedrón interpretará temas do seu repertorio persoal, no que conviven composicións propias e versións cheas de emoción, sempre acompañadas da súa inconfundible presenza escénica e do son do violonchelo. A súa música, que viaxa entre o folk, a música clásica e as novas sonoridades, crea unha experiencia única que conecta directamente co público.
Precisamente, Rosa Cedrón iniciou a súa carreira como violonchelista clásica, pero acadou gran proxección como vocalista do grupo Luar na Lubre, co que percorreu escenarios internacionais. A súa traxectoria en solitario consolidouna como unha artista versátil e comprometida, cun estilo no que se funden tradición, modernidade e unha sensibilidade artística moi persoal.
Precisamente Luar na Lubre pechará a xornada cultural e musical de Campo Lameiro iniciando a súa actuación sobre s 21:45 horas co seu característico son, no que se mesturan gaitas, frautas, cordas, percusión e voces.
Luar na Lubre fará un percorrido polos grandes éxitos da súa traxectoria e presentará temas máis recentes, sempre cunha posta en escena cargada de emoción e enerxía. A súa música, enraizada na tradición galega e aberta ás influencias doutras culturas atlánticas, fará vibrar ao público de todas as idades.
Con máis de 35 anos de traxectoria, Luar na Lubre estivo na Festa d@s Moz@s hai 33 anos e volve agora con moita máis forza, experiencia e prestixio. De feito, é un dos grupos galegos de música folk máis recoñecido a nivel internacional. Creado na Coruña en 1986, leva publicados numerosos discos e percorreu escenarios de Europa, América e Asia. A súa música combina tradición e modernidade, transmitindo a esencia da cultura galega ao mundo polo que a súa actuación será o broche de ouro da XIV Festa d@s Moz@s de Campo Lameiro.
