O Fórum Metropolitano acollerá catro proxeccións de balde con coloquios con especialistas en dereito, xornalismo, cooperación e activismo
O Concello da Coruña e a ONG coruñesa AIRE organizan a sétima edición do ciclo de cine ‘Os ollos abertos’, que terá lugar no Fórum Metropolitano entre este mércores 17 e o sábado 20 (con inicio ás 19.00 horas na Sala Marilyn Monroe), con catro sesións de balde ata completar capacidade. “Desde o Goberno de Inés Rey buscamos que a cidadanía poida acceder a ciclos e eventos culturais que supoñan un estímulo polo seu contido, como é o caso, ofrecendo longametraxes de cinema social e interesantes coloquios arredor da cuestión que nos relatan os diferentes autores”, indicou Gonzalo Castro, concelleiro de Cultura e Turismo.
Este ano o ciclo porá o foco na migración e a lexislación que a regula, abordando como a burocracia, as leis, normativas e políticas impactan na vida das persoas migrantes. A través de catro proxeccións de gran calidade artística e cinematográfica, búscase sensibilizar á cidadanía sobre unha realidade que segue marcando o presente.
Como é habitual nos diferentes ciclos de cine que organiza o Concello, cada proxección irá acompañada dun coloquio. Neste caso, haberá especialistas en dereito, xornalismo, cooperación e activismo, que aportarán contexto e abrirán debate co público asistente sobre o tema central de cada película.
AIRE é unha ONG independente con sede na Coruña que ofrece axuda humanitaria en situacións de emerxencia e desenvolve proxectos de cooperación internacional. Con iniciativas de sensibilización como este ciclo de cinema, busca diminuír o sufrimento das persoas en situación de vulnerabilidade, con especial atención a mulleres e menores.
Programación
Mércores 17: ‘Bidasoa 2018-2023’ (Fermín Muguruza, 2023). Coloquio con Ion Aranguren, membro de Irungo Harrera Sarea.
Xoves 18: ‘Código desconocido’ (Michael Haneke, 2000). Coloquio con María Teresa Bustamante, abogada y presidenta de AMIGA.
Venres 19: ‘La historia de Souleymane’ (Boris Lojkine, 2024). Coloquio con Cristina Almeida Herrero, avogada de Cáritas Salamanca.
Sábado 20: ‘No Other Land’ (Yuval Abraham, Basel Adra, Hamdan Ballal, Rachel Szor, 2024). Coloquio con Mohamed Safa, médico oftalmólogo e escritor palestino.
