A Xunta pon en marcha en Allariz a 9ª campaña da iniciativa “Merca no teu Comercio” en Ourense co gallo de dinamizar o consumo e as vendas de proximidade

• A campaña, realizada en colaboración coa Federación Galega de Comercio, estará activa deica o 15 deste mes de outubro
• Entre as persoas participantes sortearanse 20 tarxetas prepago de 50 euros, que poderán empregarse nos establecementos locais adheridos ata o 31 de decembro
• O conselleiro enmarcou o programa no Plan estratéxico do comercio de Galicia 2025-2030, que busca fortalecer o sector e responder ás novas tendencias de consumo, ao tempo que se recoñece o seu peso económico e como vertebrador do territorio

O conselleiro de Emprego, Comercio e Emigración, José González, acompañado polo director xeral de Comercio e Consumo, Gabriel Alén, e polo delegado territorial da Xunta en Ourense, Manuel Pardo, convidou aos veciños e veciñas de Allariz e da súa contorna a participar na 9ª edición quincenal do programa Merca no teu comercio na provincia de Ourense. Trátase dunha iniciativa impulsada pola Xunta en colaboración coa Federación Galega de Comercio que busca dinamizar o consumo e vendas de proximidade, principalmente no rural. De feito, cos representantes autonómicos estiveron tamén a presidenta da Federación de Comercio de Ourense, Beatriz Gómez, e a alcaldesa de Allariz, Cristina Cid.

A campaña alaricana arrancou o pasado mércores e prolongarase deica o próximo 15 de outubro. O conselleiro destacou que, como no caso das anteriores, concluirá co sorteo e repartición de 20 tarxetas prepago de 50 euros entre as persoas participantes, que poderán empregalas nos establecementos locais adheridos ata o 31 de decembro.

González puxo en valor este tipo de accións por fomentar o consumo no comercio local, destacar o seu papel como motor económico e social nas vilas rurais e reforzar a súa actividade en territorios cun menor asociacionismo. Sinalou que, tras a de Allariz, arrancará unha nova edición do proxecto no concello de Barbadás.

Finalmente, o conselleiro enmarcou o programa Merca no teu comerio no Plan estratéxico do comercio de Galicia 2025-2030 que busca fortalecer un sector comercial moderno, competitivo e preparado para responder ás novas tendencias de consumo, ao tempo que se recoñece o seu peso como xerador de emprego e riqueza e como elemento clave para a vertebración do territorio.