“Este é un goberno comprometido co deporte e avanza, de xeito imparable, para converter Pontevedra na provincia do deporte”, remarcou o presidente da Deputación Luis López
Ata 76 entidades de 24 concellos da provincia benefícianse desta liña de axudas do organismo provincial dotada con 900.000 €
A Deputación destinará preto de 50.000 euros a cinco clubs deportivos da Estrada, Lalín e Silleda que participan en competicións oficiais de ámbito estatal. En liñas xerais, son 76 as entidades de 24 concellos da provincia que se benefician desta liña de axudas do organismo provincial dotada con 900.000 €. “Este é un goberno comprometido co deporte e avanza, de xeito imparable, para converter Pontevedra na provincia do deporte”, remarcou o presidente da Deputación Luis López.
Nas comarcas do Deza e Terra de Montes benefícianse destas axudas provinciais o Club Deportivo Estradense e o Club de Tenis Recreo Cultural, da Estrada, xunto co Club Balonmán Lalín e o Extol La Gramola Team, de Lalín, e o RG Bikes Scott Team de Silleda. Estas entidades, que representan modalidades deportivas como o fútbol, o tenis, o balonmán e o ciclismo, recibirán contías que oscilan entre os 1.877 e os 25.000 €.
Nesta semana, a Deputación de Pontevedra aprobou axudas para o deporte por valor de preto de 1,5 millóns de euros dirixidas tanto aos clubs que participan en competicións oficiais de ámbito estatal como a aquelas entidades deportivas que organizan eventos e competicións. Neste último caso, ata 153 clubs deportivos recibirán este ano 550.000 €, 50.000 € máis que o pasado ano, para organizar competicións deportivas federadas oficiais de todos os ámbitos territoriais.
