O presidente provincial participou na inauguración do novo local desta asociación, creada para acompañar, orientar e defender os dereitos das persoas con Trastorno do Espectro Autista de Ourense, promovendo a súa inclusión plena en todos os ámbitos da sociedade
O presidente da Deputación, Luis Menor, participou esta mañá na inauguración da nova sede de Por Eles TEA, onde quixo lembrar a primeira reunión que mantivo como responsable provincial con esta asociación, creada para acompañar, orientar e defender os dereitos das persoas con Trastorno do Espectro Autista. “Naquela reunión transmitíronme o seu gran soño, que era contar cunha sede propia. E hoxe, ese soño é realidade e síntome co deber cumprido”, proclamou.
Precisamente, Luis Menor lembrou que a colaboración da Deputación para conseguir hoxe ese obxectivo foi “moi importante”, e avanzou que a institución provincial continuará a prestar apoio, dentro das súas posibilidades, “para botar unha man en todo o que faga falta”.
De feito, Menor tamén quixo recoñecer o labor que realiza a Área de Política Social da Deputación, en contacto permanente cos colectivos sociais para poder “canalizar mellor a cooperación posible para desenvolver os seus proxectos, porque as administracións debemos estar para resolver problemas”.
