O Concello de Baiona, a través da Concellería de Deportes e Política Social, celebrou unha reunión con representantes de asociacións deportivas do municipio e a Asociación Alborada, co obxectivo de crear unha rede de colaboración en torno ao programa Panacea, unha iniciativa que promove a prevención e o acompañamento nos casos de adiccións desde un enfoque comunitario e positivo.
O encontro, que tivo lugar no Multiusos Ángel Bedriñana de Baiona, serviu como punto de partida para tecer lazos entre o tecido deportivo local e o programa Panacea, fomentando a cooperación e o intercambio de recursos para impulsar hábitos de vida saudables, benestar emocional e cohesión social.
O programa Panacea, desenvolto pola Asociación Alborada, traballa cun enfoque integral, abordando as adiccións en sentido amplo —xa sexan a substancias, ao xogo ou ao uso excesivo de pantallas—, e apostando pola prevención, a información e a sensibilización a través da colaboración con entidades sociais, educativas e deportivas.
O alcalde de Baiona, Jesús Vázquez Almuiña destacou a importancia de que Baiona unase activamente a este proxecto, “O deporte é unha ferramenta fundamental para promover valores, fortalecer vínculos e previr condutas de risco. Queremos que Baiona sexa un exemplo de comunidade que coida, escoita e acompaña. Con Panacea comezamos a construír esa rede de apoio desde o local”.
Desde o Concello subliñouse que esta primeira reunión marca o inicio dun traballo continuado para consolidar en Baiona unha rede estable de entidades deportivas e sociais, que contribuirá a fortalecer o benestar da cidadanía.
