O Concello de Pontevedra, no marco da divulgación do proxecto RedeVerde Pontevedra, visitou centros de ensino da cidade para identificar especies vexetais e animais do barrio, afondar na reciclaxe e compostaxe, concienciar da importancia de coidar os espazos públicos e naturais do concello.
O proxecto conta co apoio da Fundación Biodiversidad do Ministerio para la Transición Ecoógica y el Reto Demográfico (MITECO) no marco do Plan de Recuperación, Transformación y Resiliencia (PRTR), financiado pola Unión Europea – NextGenerationEU.
O Concello de Pontevedra celebrou nestas dúas últimas semanas o programa “Laboratorios verdes”, enmarcados no proxecto RedeVerde Pontevedra, na que os escolares do concello puideron comprender a importancia de coidar a súa contorna urbana
Participaron nesta iniciativa o CEIP Álvarez Limeses, o CEIP Manuel Vidal Portela, o IES Luís Seoane, o CEIP Froebel, o CEIP San Martiño, o CEIP Parada-Campañó, o CEIP Vilaverde-Mourente, o CEIP Marcos da Portela e o CEIP de Cabanas. Estes “Laboratorios verdes” permitiron ao alumnado:
- Explorar a biodiversidade local, identificando especies vexetais e animais presentes nos seus barrios e arredores.
- Participar en talleres de sostibilidade, aprendendo sobre reciclaxe, compostaxe e uso responsable dos recursos.
- Descubrir a importancia dos espazos verdes urbanos, fomentando a creatividade e a conciencia ambiental desde idades temperás.
- Fomentar o traballo en equipo e a colaboración, achegando a ciencia e a natureza á vida cotiá da cidade.
Esta actividade forma parte do plan de sensibilización ambiental de RedeVerde Pontevedra, cuxo obxectivo é achegar á cidadanía, especialmente aos máis novos, os beneficios de integrar a natureza na cidade e promover hábitos respectuosos co medio ambiente.
Os “Laboratorios verdes” son un exemplo de como a educación e a participación activa poden contribuír a unha Pontevedra máis verde, sostible e resiliente, achegando a ciencia e a natureza á infancia de maneira práctica e motivadora.
O proxecto RedeVerde Pontevedra conta co apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do Plan de Recuperación, Transformación y Resiliencia (PRTR), financiado pola Unión Europea – NextGenerationEU
