• Os populares demandan explicacións na comisión de Ordenación do Territorio, Urbanismo e Medio Ambiente pola sentenza xudicial que obriga ao Concello de Pontevedra a pagar case 1M€ por unha expropiación que os técnicos municipais habían taxado en 217.000 euros
• O líder do PP de Pontevedra comprométese a liderar “un Concello máis resolutivo e eficaz, con planificación, diálogo e execución, que non pague os erros propios da ausencia de xestión política con diñeiro público, como sucede frecuentemente co BNG”
O presidente local e portavoz municipal do Partido Popular de Pontevedra, Rafa Domínguez, cargou contra a xestión económica e urbanística do alcalde da cidade, #Miguel Anxo Fernández Lores, tras recibir “un novo pau da xustiza” ao multiplicar case por cinco o valor para pagar dunha expropiación na rúa Bibiano Fernández Osorio-Tafall, que o Concello taxara en 217.000 euros.
Domínguez lamentou que o Concello de Pontevedra véxase abocado a abonar 991.559,52 euros a un particular que gañou a batalla xudicial contra a administración local nos tribunais “por un terreo de apenas 480 metros que as arcas municipais sufragarán por máis de 2.000 euros o metro cadrado, ao prezo do que custaría un piso en pleno centro de Pontevedra”.
“O máis grave non é só o custo económico, senón a desidia e inacción sistemática do goberno local do BNG durante máis de tres décadas de bloqueo do desenvolvemento urbanístico da cidade. Desde 1989, o Plan Xeral de Ordenación Municipal (PXOM) reserva estes terreos para usos dotacionais, pero o Concello nin executa nin compensa, deixando aos propietarios nun limbo legal e económico”, declarou tras facerse eco da información publicada por La Voz de Galicia esta fin de semana.
Os concelleiros do PP de Pontevedra preguntaron este martes na comisión de Ordenación do Territorio, Urbanismo e Medio Ambiente por este novo “pau xudicial” e afearon a “xestión opaca, improvisada e custosa” do goberno de Lores por actuar “a golpe de sentenza, sen planificación, sen diálogo cos afectados e sen previsión orzamentaria”.
Ademais, pediu explicacións ao goberno do BNG por “outra xogada mestra de Lores que pon de manifesto a súa nefasta xestión económica, ao non actuar en 30 anos, e permitir que se siga malgastando o diñeiro de todos os pontevedreses tras perder xa 1M€ de fondos europeos para mellorar os salóns do Lérez e estar a piques de perder outros 2,2M€ por non finalizar as obras do destape do río Gafos antes de finalizar o 2025”.
Por último, o líder dos populares comprometeuse a liderar a partir das próximas eleccións municipais “un Concello de Pontevedra máis resolutivo e eficaz, con planificación, diálogo e execución, para non pagar os erros propios da falta de xestión política con diñeiro público, como sucede frecuentemente con Lores”.
