A iniciativa moañesa será difundida nunha publicación estatal como unha “boa práctica” exportable a outros municipios
O Concello de Moaña, da man da alcaldesa Leticia Santos e da concelleira de Benestar Social María Sanluís, recolleu hoxe en Madrid o accésit dos ‘V Premios de Calidade’ da Rede Española de Cidades Saudables (RECS) pola súa ‘Escola de Saúde’. O xurado considerou que a iniciativa do goberno moañés, que competía na categoría de ‘Desenvolvemento da Acción Comunitaria para a Promoción da Saúde’ de entidades de menos de 20.000 habitantes, é unha proposta exemplar que contribuíu a mellorar a saúde e benestar da veciñanza neste ano 2025.
A alcaldesa Leticia Santos amosouse entusiasmada e orgullosa ao recoller o premio e subliñou que este “é o reflexo do compromiso que temos en Moaña coa promoción da saúde e o benestar da nosa xente e supón un recoñecemento non só ao noso traballo, senón ao esforzo conxunto de todas as profesionais e veciñas que participan no programa, que é innovador e xa unha referencia entre os municipios de todo o estado”, destacou Santos.
Na mesma liña manifestouse a concelleira María Sanluís, quen se dirixiu publicamente aos colectivos involucrados na iniciativa (asociacións de doentes, veciñais, sociais, deportivas, farmacias de Moaña e comarca, así como profesionais do Sergas e do centro de saúde local) para subliñar que “o traballo é voso”, agradecendo a gran participación na proposta municipal, “ante a que sempre estades dispostas a colaborar”.
‘Moaña Escola de Saúde’ é un proxecto municipal impulsado en 2023 coa chegada de Sanluís ao goberno local para promocionar a saúde e mellorar o benestar físico, mental e social da veciñanza a través da participación activa, a formación e o apoio comunitario. Dende a súa posta en marcha desenvolvéronse diferentes actividades, principalmente charlas e xornadas de divulgación, concienciación e asesoramento sobre temas variados escollidos facendo equipa cos colectivos e tecendo redes de apoio.
Algunhas das temáticas abordadas foron os mitos e realidades do TDAH, a saúde sexual, a saúde mental na infancia e na adolescencia e a influencia das novas tecnoloxías, as altas capacidades ou a maternidade e a crianza. Segundo apunta o Concello, todas as citas tiveron unha grande acollida entre a veciñanza, enchendo a maior parte dos coloquios con profesionais e especialistas en cada área.
A ‘Escola de saúde’ de Moaña foi considerada merecedora do accésit da quinta edición dos ‘Premios de Calidade’ da RECS por cumprir sobradamente cos criterios esixidos. O xurado destacou que responde ás necesidades da poboación, mellora a calidade de vida da cidadanía con grande impacto sobre a poboación, e que ten continuidade e sustentabilidade, financiamento económico específico e reflexo nos orzamentos municipais (o Concello de Moaña conseguiu incluso subvencións externas para o seu desenvolvemento), así como unha formulación innovadora e orixinal.
O programa moañés foi seleccionado como accésit dentro do grupo de concellos de menos de 20.000 habitantes. En total, a RECS concedeu nove premios principais, un por cada categoría (3) e tramo poboacional (3) entre as 552 entidades locais pertencentes á rede, reservándose a capacidade de outorgar accésits cando o xurado estimase oportuno dar unha distinción extraordinaria polo “especial valor” dalgunha das actuacións presentadas e non premiadas cos tres primeiros postos, como foi o caso de Moaña.
Dado que a experiencia da ‘Escola de Saúde’ foi considerada destacada, tomará parte da publicación de ‘Boas Prácticas’ en materia de promoción da saúde que realizará a Rede Española de Cidades Saudables e que se realizará en diferentes formatos así como a través da páxina web. A intención será a difusión das experiencias para que sexan exportadas, replicándoas e adaptándoas por outros gobernos locais.
O premio a Moaña foi recollido hoxe en Madrid no marco da ‘XII Xornada da Implementación Local da Estratexia de Promoción da Saúde e Prevención no Sistema Nacional de Saúde’ -da que tamén toma parte o Concello-, baixo o lema ‘Conectando Saúde. Sinerxias e Redes no entorno local’.
