A Concellería de Vías e Obras do Concello de Ponteareas vén de acometer unhas obras urxentes de reparación no subsolo da avenida de Galicia e da rúa Rosalía de Castro, unha das vías máis céntricas e transitadas do municipio, que serve ademais de acceso ás estradas das Neves e Salvaterra.
As deficiencias nas canalizacións soterradas provocaban continuos afundimentos do firme, con fochancas profundas que dificultaban o tránsito de vehículos e peóns. Ademais, os problemas nas tubaxes ocasionaban atascos e filtracións nos baixos das edificacións próximas, especialmente en episodios de choiva intensa.
O anterior goberno municipal realizara unha actuación que supostamente era de mellora nesta rúa cun investimento de preto de 100.000 euros, pero a mala execución das obras deixando tubaxes rotas soterradas derivou nos problemas actuais. “Un lavado de cara que vendía unha mellora inexistente porque dende entón existen permanentemente fochancas que debemos sinalizar e reparar continuamente provocando obstrucións na circulación de tráfico e inundacións de baixos e garaxes”, explica Juan Carlos Glez. Carrera, tenente de alcaldesa e edil de Vías e Obras, que coordinou uns “traballos que ofrecen unha solucións duradeira. As choivas dos pasados días foron unha mostra do traballo ben feito ao non producirse xa inundacións en garaxes e baixos de edificios”.
O Concello de Ponteareas asumiu agora a reparación integral das deficiencias no subsolo, substituíndo e reparando as canalizacións en mal estado e procedendo posteriormente á reposición do asfaltado.
Grazas a esta intervención, hoxe —nunha xornada de intensas precipitacións— a rúa Rosalía de Castro xa non presenta inundacións nos baixos dos edificios, poñendo así fin a unha situación que a veciñanza viña padecendo dende hai anos. Ademais, a actuación mellora a seguridade viaria e facilita o tránsito de vehículos nunha das principais arterias do centro urbano.
A alcaldesa Nava Castro insiste na necesidade de executar obras “pensadas, ben planificadas e sempre supervisadas” deseñadas cunha visión integral para facer unha xestión pública eficaz e o máis eficiente posible.
