Durante os próximos dous meses avaliaranse as candidaturas conforme aos criterios establecidos no prego, co obxectivo de seleccionar cinco finalistas
A partir dese momento, abrirase un período de cinco meses para que os finalistas preparen as súas propostas técnicas, e elixirase entre elas á adxudicataria do Máster Plan
A licitación pública para a redacción do Máster Plan de Coruña Marítima concluíu a súa fase de presentación de candidaturas, cun total de 15 propostas recibidas. O proceso busca seleccionar o equipo responsable de deseñar o futuro do porto interior e a súa integración coa cidade.
Nos próximos días reunirase a Mesa de Contratación, que procederá á apertura da documentación xeral presentada e á identificación das empresas e unións temporais de empresas (UTEs) participantes.
Selección de finalistas
A partir dese momento, abrirase un prazo de dous meses durante o que se procederá a seleccionar os cinco finalistas, segundo os criterios que figuran no prego. As bases da licitación manteñen a necesidade de que os equipos sexan multidisciplinares, con experiencia acreditada en áreas como urbanismo, paisaxismo, arquitectura, hidroloxía, portos, ferrocarrís e mobilidade, entre outras, dada a complexidade do ámbito de actuación, ao redor dun millón de metros cadrados.
A selección valorará especialmente a calidade e complexidade dos traballos previos, así como a traxectoria profesional, experiencia e recoñecementos obtidos polos equipos. Priorizarase a excelencia técnica fronte ao volume de proxectos realizados.
Avaliación final e adxudicación
Unha vez seleccionados os cinco equipos finalistas, abrirase un período de cinco meses para que estes preparen as súas propostas. Cada unha das cinco ofertas será valorada con criterios que terán en conta a calidade técnica da proposta, a súa funcionalidade, os aspectos ambientais e os aspectos económicos. Desta avaliación sairá a adxudicataria do Máster Plan e nese momento xa se coñecerá a maqueta de todo o proxecto.
O equipo gañador terá entón un ano para desenvolver o plan director do proxecto Coruña Marítima, así como todos os anexos e documentos complementarios que figuran nas bases. O importe da licitación é de 3 millóns de euros, que serán financiados polas seis administracións que impulsan o proxecto: Concello da Coruña, Autoridade Portuaria, Xunta de Galicia, Ministerio de Transportes y Movilidad Sostenible, Puertos del Estado e ADIF.
Un proxecto estratéxico para a cidade
O Máster Plan deberá cumprir cos catorce Acordos Estratéxicos aprobados pola
Comisión Coruña Marítima. Entre os seus obxectivos destacan:
-Reforzar a actividade portuaria
-Impulsar novas actividades económicas
-Mellorar a mobilidade urbana e metropolitana
-Crear novos equipamentos públicos, incluído un edificio emblemático que caracterice a intervención
-Potenciar as zonas verdes e a sustentabilidade
O ámbito de actuación abarca desde o dique de abrigo ata a dársena de Oza, incluíndo a estación de mercadorías de San Diego. O proxecto deberá ser ambicioso, innovador, propositivo e flexible, cun proxecto que reflicta a esencia da Coruña. Tal como recóllese expresamente nas bases, a solución proposta debe ser “coruñesa”, que entenda a escala e o espírito da Coruña, así como o carácter singular da cidade.
