O proceso contou cunha participación cidadá de diversos perfís e zonas de Pontevedra que participaron en mesas de diálogo, talleres e rutas polos espazos naturais clave do municipio.
O diagnóstico colectivo destacou a gran superficie verde, a mobilidade sostible e o forte tecido social da cidade como valores diferenciais.
As ameazas identificadas inclúen as zonas inundables, o turismo descontrolado e a perda de transporte público, pero abren oportunidades para protexer ríos e a biodiversidade local.
O proxecto conta co apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do Plan de Recuperación, Transformación y Resiliencia (PRTR), financiado pola Unión Europea – NextGenerationEU.
Pontevedra avanza na súa estratexia de renaturalización urbana coa celebración das Tribunas Medioambientais RedeVerde, un espazo de diálogo que reuniu a cidadáns, expertos e colectivos sociais para elaborar un diagnóstico compartido sobre o futuro medioambiental da cidade.
Organizadas polo Concello de Pontevedra en colaboración coa Fundación Biodiversidad e a Universidade da Coruña, estas xornadas combinaron mesas de traballo, obradoiros e rutas por espazos naturais clave, situando á cidade na vangarda do planeamento urbano sostible e participativo.
O proceso participativo permitiu debuxar un retrato nítido de Pontevedra. Os participantes destacaron como valores diferenciais a gran superficie de espazos verdes, o “tamaño humano” da cidade, a existencia de zonas periurbanas e fluviais, e unha mobilidade peonil que garante baixos niveis de contaminación e unha alta calidade de vida. Así mesmo, recoñeceuse a fortaleza dun “tecido social organizado e comprometido” como pilar fundamental para o éxito de calquera iniciativa futura.
O diagnóstico identificou ameazas e debilidades que requiren atención, como as zonas inundables, o crecemento dun “turismo descontrolado”, o risco de temperaturas extremas e as carencias na rede de carril bici e no transporte público cara ao rural.
Estes desafíos, con todo, percíbense como oportunidades claras para a acción. O consenso apuntou cara á necesidade de protexer e potenciar os corredores fluviais, ampliar os modelos de gobernanza ambiental, preservar as especies autóctonas e vincular a renaturalización cun turismo sostible.
As xornadas contaron coa ponencia de Francisco Alberto Varela, da Universidade da Coruña, quen presentou a estratexia de infraestrutura verde como unha ferramenta clave para conectar os espazos naturais, promover a biodiversidade e adaptar a cidade ao cambio climático.
Neste sentido, visibilizáronse proxectos que xa son referencia na materia, como a restauración do río Gafos e as rutas pola marisma do Alba, exemplos prácticos de recuperación medioambiental. Tamén se destacou o traballo interdisciplinar do equipo da arquitecta Mercedes Fernández Díaz na restauración de marismas.
As Tribunas Medioambientais RedeVerde concluíron cunha folla de ruta marcada pola cidadanía. Reclamouse un seguimento continuado das actuacións e unha aplicación práctica do coñecemento xerado. A conclusión final subliña a necesidade de “ligar a renaturalización co turismo sostible” e de consolidar un modelo de “cidade de proximidade”, reforzando a aposta polo comercio local fronte aos grandes centros comerciais.
O proxecto é promovido polo Concello de Pontevedra, apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do Plan de Recuperación, Transformación y Resiliencia (PRTR), financiado pola Unión Europea – NextGenerationEU e coa colaboración da Universidade da Coruña como entidade agregada.
