O proxecto “Mellora no campo de fútbol de Louredo” gaña o proceso de orzamentos participativos “Mos Decide”
O Concello de Mos culmina con éxito o seu primeiro proceso de orzamentos participativos “Mos Decide”, un proxecto pioneiro de democracia directa que converte ao municipio nun dos poucos de toda España que deron este paso decidido cara á participación cidadá real.
Tralo peche do proceso de votación, o proxecto “Mellora no Campo de Fútbol de Louredo” resultou o máis votado entre as once propostas finalistas presentadas pola veciñanza mosense, elixido de maneira libre e transparente a través da plataforma https://decide.mos.es.
Esta proposta gañadora ten un orzamento de 200.000 euros e propón a realización dunha mellora integral neste campo de fútbol municipal.
O número total de votos emitidos neste proceso participativo foi de 2.247 votos, o que supón o 14,87% de porcentaxe de participación en Mos Decide 2026. A proposta do campo de fútbol de Louredo resultou gañadora con 541 votos (24,05%).
En canto ás propostas máis votadas, en segundo lugar nas votacións finalizou o proxecto do Aparcamento público na contorna do Pazo de Mos, Parque Pesqueira e Paseo do Louro, con 368 votos (16,39%) e, en terceiro lugar, finalizou o da mellora da seguridade e humanización dende a Capela San Amaro a Arrubial, con 305 votos (13,58%). En ámbolos dous casos o orzamento ascendía aos 200.000 euros.
A alcaldesa de Mos, Nidia Arévalo, destacou que “Mos Decide” é “un fito histórico para o noso municipio e un exemplo de confianza plena na cidadanía. Moi poucos concellos en España deron un paso tan ambicioso e comprometido coa participación veciñal. Mos está a facer historia coas persoas no centro das decisións”.
O proceso, aberto a todalas persoas maiores de 16 anos empadroadas en Mos, desenvolveuse ao longo de varias fases: presentación de propostas cidadás, avaliación técnica por parte do Concello e votación final, que estivo activa durante varios días.
A alcaldesa agradeceu “a implicación de todalas persoas que participaron, propoñendo, votando e facendo de Mos un referente de participación cidadá real” e anunciou que o proxecto gañador será incorporado ao orzamento municipal de 2026 para a súa execución.
Arévalo concluíu sinalando que “Mos Decide non é un punto final, é un punto de partida. Porque a mellor maneira de construír o Mos do futuro é facelo entre todos e todas”.
O acto contou tamén cunha intervención sobre o valor da participación cidadá na construción dun Concello máis aberto e colaborativo a cargo de Pedro Puy Fraga, doutor en Dereito e profesor titular de Facenda Pública na Universidade de Santiago de Compostela.
