O prazo de inscrición para ambas as dúas actividades rematará o 5 de decembro.
Teñen como obxectivo prioritario facilitar a conciliación familiar, laboral e persoal durante o tempo de lecer á vez que ofrece á cativada espazos educativos, de recreo e igualitarios.
O Concello de Paderne vén de aprobar as bases reguladoras das Aulas de Conciliación de Nadal 2025 e do Campamento de Nadal 2025, ambos os servizo destinados a facilitar a conciliación familiar, laboral e persoal durante o tempo de lecer, á vez que ofrece ás nenas e nenos do municipio espazos educativos, de recreación e igualitarios.
As Aulas de Nadal están dirixidas a menores nados/as entre 2021 e os 8 anos de idade, preferentemente empadroados/as en Paderne. Para o Campamento de Nadal, a cativada destinataria serán menores de 9 a 14 anos de idade.
Criterios de selección
No caso de que o número de solicitudes supere as prazas dispoñibles, aplicaranse criterios como: Rendas familiares inferiores a 3 veces o IPREM; familias monoparentais; mulleres vítimas de violencia de xénero; desemprego de longa duración; familias numerosas ou en situación de coidados e situación laboral activa de ambos proxenitores. Se continúa habendo máis demanda que oferta, efectuarase un sorteo público, establecendo unha lista de agarda.
Datas, horarios e actividades
As Aulas desenvolveranse no Centro de Maiores, aula de informática, biblioteca e parque anexo ao Concello, do 22 de decembro ao 2 de xaneiro, excluíndo os días 24, 25 e 31 de decembro e 1 de xaneiro. Haberá dúas quendas e o horario será de 8:00 a 15:00 horas, con entradas e saídas flexibles.
• 1ª quenda: 22, 23 e 26 de decembro
• 2ª quenda: 29 e 30 de decembro e 2 de xaneiro
O Campamento de Nadal celebrarase desde o 22 de decembro ata o 2 de xaneiro, exceptuando os días 24, 25 e 31 de decembro e 1 de xaneiro) en horario de 8:00 a 15:00 horas. A entrada será flexible entre as 8:00 e as 9:00 horas e a saída tamén o será, entre as 14:00 e as 15:00 horas.
O prazo de inscrición será ata o 5 de decembro de 2025, e deberá presentarse a documentación esixida —solicitude, DNI, tarxeta sanitaria, informes ou certificados cando proceda, e acreditación de criterios— preferiblemente a través do Rexistro Electrónico do Concello.
A listaxe provisional publicarase no taboleiro de anuncios da sede electrónica. As persoas solicitantes disporán de 2 días hábiles para presentar alegacións. A listaxe definitiva publicarase a semana do 8 de decembro.
