· Este venres, 21 de novembro, celebrarase a Mesa Local de Coordinación Institucional contra esta lacra social na Casa da Mocidade.
· O martes, 25 de novembro, terá lugar unha concentración nos xardíns de Valle-Inclán ás 19.00 horas.
Desmárcate! da violencia de xénero. Ese é o eixo e lema central da nova campaña que a Concellería de Igualdade pon en marcha para conmemorar o 25 de novembro (Día Internacional de Loita contra a Violencia de Xénero). A concelleira, Estefanía Ramos, presentou o programa da nova edición, moi centrado en concienciar e sensibilizar “ás novas xeracións, peza clave na erradicación desta lacra social”, explicou. A programación inclúe contacontos, obradoiros de sensibilización, representacións artísticas, teatro e mesmo un scape room sobre a violencia machista.
Por unha banda, ademais das sesións de contacontos realizadas nos últimos días, xa están en marcha os obradoiros lúdicos de sensibilización contra a violencia machista. Estes realizaranse ata o venres, 21 de novembro, no CEP Salustiano Rey Eiras e do 26 ao 28 de novembro no CEP Pilar Maestú Sierra.
Pola outra banda, este venres, 21 de novembro, terá lugar a Mesa Local de Coordinación Institucional contra a Violencia de Xénero do Concello da Pobra. Será ás 10.00 horas na Casa da Mocidade.
O propio martes, 25 de novembro, inaugurarase a exposición artística Zapatos vermellos, realizada cos centros de educación primaria do municipio. Ese mesmo día, os rapaces e rapaces poderán gozar, ademais, da obra Crisálida. Ás 19.00 horas, os xardíns de Valle-Inclán acollerán a concentración do 25N, que dará comezo xunto á escultura en homenaxe ás vítimas da violencia de xénero.
O programa concluirá o mércores, 26 de novembro, con dúas novas propostas para os máis novos: o Túnel das voces, unha instalación inmersiva para o estudantado do IES da Pobra do Caramiñal e un scape room contra a violencia de xénero para o alumnado do CPR Divino Maestro. Ambas actividades estarán impartidas por Koremi.
