Reducirá a superficie mínima de 100 metros cadrados libres que establece a regulación actual
O alcalde de Ourense, Gonzalo Pérez Jácome, anunciou esta mañá que o Concello revisará a normativa municipal que regula a concesión de licenzas de vaos para garaxes. O obxectivo da reforma é modificar á baixa a superficie mínima que debe ter un local para obter esta autorización.
Actualmente para un vao permanente requírese que o local teña unha superficie de, como mínimo, 100 metros cadrados libres. O goberno municipal considera que esta é unha dimensión “excesiva e non xustificada. Non ten sentido porque impide que haxa máis vaos en Ourense e que polo tanto haxa máis calidade de vida para os cidadáns”.
O Concello revisará esta dimensión mínima á baixa coa finalidade de “dar máis facilidades para que a xente poida ter máis aparcamentos nas divisións horizontais dos edificios, revalorizar os espazos urbanos e o patrimonio inmobiliario dos ourensáns”.
O Concello de Ourense revisará tamén a normativa reguladora no relativo aos vaos permanentes dos garaxes comunitarios e os vaos laborais.
