O primeiro día do mercado aberto coincidirá co acendido oficial do Nadal no municipio
O Concello de Mos anuncia a celebración da III Edición do Mercado Aberto “Queda en Mos”, que se desenvolverá os días 6 e 7 de decembro de 2025, coincidindo co acendido oficial do Nadal no municipio. Un evento ao aire libre que converterá Mos nun espazo de encontro, dinamización comercial e lecer para toda a veciñanza, co obxectivo de impulsar o comercio local e favorecer a economía de proximidade.
Nesta terceira edición participarán 25 establecementos do comercio local, que disporán os seus produtos e servizos nun formato de mercado aberto, atractivo e dinámico. A isto súmanse actuacións musicais, actividades familiares, propostas culturais e a implicación da hostalaría, que ofrecerá diferentes iniciativas gastronómicas ao longo das dúas xornadas.
PROGRAMACIÓN DE ACTIVIDADES:
Sábado 6 de decembro
12:00 h: Canto contigo – Paco Nogueiras
Taller – Aula Cerámica AICA
13:00 h: Argonat Band
Desde as 17:00 h : Acendido do Nadal
Espectáculo LED: A Raíña da Neve
Taller de pintacaras
18:30 h: Cantajuego – El Payaso Tallarín
20:00 h: Bela & Charro
Domingo 7 de decembro
12:00 h: Ioga en familia – Kenguru
13:00 h: Charanga Sacacorchos
17:00 h: Ce Orquestra Pantasma
20:00 h: Algaravía Folk
Campaña “Compra e Gaña en Mos”
As urnas para participar no sorteo da “Campaña Compra e Gaña en Mos” permanecerán dispoñibles ata o 1 de decembro, e o sorteo realizarase o día 3 de decembro. Repartiranse tarxetas regalo de 200 €, 100 € e 50 €, destinadas exclusivamente a compras nos comercios locais de Mos. Os premios entregaranse durante a inauguración do Mercado Aberto, o sábado 6 ás 12:00 horas.
Co Mercado Aberto “Queda en Mos” e coa campaña “Compra e Gaña en Mos”, o Concello de Mos reforza o seu compromiso co apoio ao tecido comercial e hostaleiro, promovendo iniciativas que dinamizan a vida social e cultural, fortalecen o comercio de proximidade e consolidan Mos como un municipio vivo, activo e acolledor.
