Deporte, saúde e solidariedade irán da man este domingo, 30 de novembro, ás 10:30 h con saída nas instalacións do Club Náutico Pontecesures.
A Asociación Galega de Linfedema, Lipedema, Insuficiencia Venosa Crónica e outras Patoloxías Vasculares Periféricas (AGL) organiza a Primeira Edición da Ruta Fluvial Dragon Boat polo río Ulla, unha iniciativa pioneira en Galicia que combina deporte, saúde e sororidade entre mulleres superviventes de cancro de mama.
O evento celebrarase o domingo, 16 de novembro, ás 10:30 h nas instalacións do Club Náutico Pontecesures, para realizar un percorrido simbólico polo río Ulla. A actividade, aberta a quen teña interese en participar, ten como obxectivo promover o benestar físico, emocional e social das persoas participantes, destacando o valor terapéutico e simbólico do Dragon Boat como ferramenta de recuperación e apoio.
Durante a xornada realizaranse actividades de quecemento guiado, a ruta fluvial, un acto conmemorativo en homenaxe ás compañeiras e un espazo final de convivencia cun refrixerio saudable.
O Dragon Boat, ademais de ser un deporte en crecemento, é recoñecido polos seus beneficios na prevención e mellora do linfedema, na recuperación da forza e capacidade pulmonar, así como no benestar emocional das mulleres que o practican.
Esta primeira edición pretende consolidarse como unha cita anual de referencia en Pontecesures, unindo saúde, superación persoal e visibilidade social.
“Remamos xuntas pola vida, pola superación e pola esperanza”, sinalan dende a Asociación Galega de Linfedema, impulsora desta acción solidaria e de saúde pública.
A actividade conta coa colaboración da Xunta de Galicia, a través de Deporte Galego, e do Club Náutico Pontecesures.
