O Concello de Mos recibiu hoxe a visita dun total de 90 nenos e nenas de 4 e 5 anos do Colexio Lar, nunha actividade educativa que puido celebrarse finalmente nesta data tras ser aprazada o pasado 12 de novembro debido ás condicións meteorolóxicas adversas.
A xornada desenvolveuse combinando dous itinerarios paralelos para facilitar a participación dos dous grupos. Así, mentres o alumnado de 4 anos realizaba un percorrido polo edificio consistorial, o alumnado de 5 anos achegábase á explanada municipal para coñecer de preto os vehículos e equipamentos da Policía Local e do Servizo de Emerxencias. A continuación, ambos grupos intercambiaron as actividades para poder gozar de todas as propostas programadas.
Durante a visita institucional, os máis pequenos tiveron a oportunidade de percorrer as dependencias municipais, coñecer o salón de plenos e descubrir como funciona o día a día dun Concello: que labores realizan os distintos departamentos, quen toma as decisións, ou como se organizan os servizos públicos que dan resposta ás necesidades da veciñanza. O interese e a curiosidade do alumnado fixéronse notar a través das súas preguntas e comentarios ao longo do percorrido.
Pola súa parte, na zona exterior os escolares gozaron dunha explicación práctica do funcionamento dos vehículos policiais e de emerxencias. O persoal da Policía Local e do Servizo de Emerxencias mostroulles os diferentes materiais que utilizan, explicoulles como se actúa en situacións de risco e transmitiulles mensaxes clave de prevención e seguridade adaptadas á súa idade. Os nenos e nenas puideron interactuar cos profesionais, observar o interior dos vehículos e experimentar de maneira guiada parte do seu equipamento.
O Concello de Mos agradece ao Colexio Lar a súa participación e subliña a importancia de promover actividades educativas que permitan á infancia coñecer o funcionamento das institucións, fomentar o respecto polos servizos públicos e achegar valores de convivencia, colaboración e responsabilidade cidadá.
