O concelleiro de Vías e Obras, Xesús Domínguez, compareceu este venres en rolda de prensa para explicar o importante labor de execución que está a desenvolver este departamento. Estivo acompañado do xefe de servizo de Obras e Proxectos, Antonio Ranedo, ao que lle agradeceu a dedicación e esforzo nas iniciativas que se están desenvolvemento, agradecemento que fixo tamén á brigada e a todo o persoal do departamento. No balance que expuso, Domínguez avanzou que en próximos días vaise celebrar o acto formal de recepción da reurbanización de Puente la Reina e que xa está programada a actuación de mellora da accesibilidade na Rúa do Hórreo, no cruzamento coa rúa Gómez Ulla.
Antes de entrar en materia, Xesús Domínguez explicou que, para alén das especificidades de cada traballo, todas as obras teñen uns obxectivos comúns: mellorar a accesibilidade e a seguridade das persoas; mellorar a eficiencia enerxética e incorporar medidas que permitan aumentar a resiliencia de Compostela e a adaptación ao cambio climático; mellorar a prestación dos servizos públicos; e incrementar a calidade do espazo público. En síntese, dixo, “o obxectivo é mellorar a calidade de vida das persoas e vivir nunha cidade máis saudable e equitativa”.
O investimento neste 2025 ascende a máis de 12 millóns de euros, que se reparten entre obras de espazo público e de rehabilitación de edificios públicos. Deste xeito, as actuacións, tanto as rematadas neste último ano como as que se atopan en fase de proxecto, debuxan “un mapa disperso que abrangue todos os tecidos urbanos de Compostela”. O concelleiro foi debullando o traballo feito e en execución das obras.
Puente La Reina
A reurbanización desta obra encara o seu final, cos traballos practicamente rematados, de maneira que xa se vai celebrar nos próximos días o acto formal de recepción. O orzamento de execución foi de 493.294,01 euros. Na súa explicación mostrou imaxes de como era o estado anterior e actual, ao respecto do que Domínguez destacou a “evidente mellora dda calidade do espazo da rúa”. Engadiu que os materiais empregados son coherentes coas reformas que se fixeron en rúas próximas, como a rúa de Quiroga Palacios ou Batalla de Clavijo e explicou que a nova organización inclúe un carril de circulación único, mellora a seguridade peonil. Esta obra tamén supón unha mellora ambiental na rúa colocando arboredo, reordenando os espazos de aparcamento e a posición do mobiliario urbano e renovación das redes de servizos.
Na liña deste tipo de obras en espazos públicos, Xesús Domínguez indicou que tamén avanzan os traballos para a rexeneración da rúa García Lorca, que dotará o espazo público da rúa de itinerarios accesibles tanto lonxitudinalmente, como no acceso a cada portal. O orzamento da obra é de 1.198.901,06 euros e o remate está previsto para decembro de 2026.
Barrio Verde de Pontepedriña
De novo, Xesús Domínguez referiuse a unha das grandes transformacións que se están acometendo en Santiago, como é o quinteiro de Pontepedriña para converterse nun barrio verde, cun orzamento de 1,9 millóns de euros.
Esta actuación enmárcase no proxecto Entre Sar e Sarela, que se desenvolve en conxunto coa USC. Ao respecto, lembrou que Santiago conta xa coa primeira estratexia verde de infraestrutura local e adaptación ao cambio climático que concreta a estratexia galega, estatal e europea.
Así as cousas, esta obra de Pontepedriña, situada no anel verde que rodea a cidade, será un modelo para a transformación doutros tecidos urbanos da cidade para incorporar as solucións baseadas na natureza ao deseño da cidade, mellorar o metabolismo urbano e incrementar a calidade ambiental do espazo público, gañando espazo para as persoas e reducíndoo para o coche.
No seu repaso, indicou que os traballos avanzan en varias liñas, tanto eliminando especies foráneas ou invasoras; como na demolición de firme asfáltico, o que posibilitará a implantación de sistemas de drenaxe urbano sustentable (SUDS). E nas próximas semanas, comezarán os traballos na outra marxe da rúa de Amor Ruibal e tamén no resto de zonas verdes, centrándose na demolición de superficies impermeables e aumentando o arboredo e outros elementos vexetais para reducir o impacto das infraestruturas.
No marco de Entre Sar e Sarela, tamén se está traballando na rexeneración do espazo que fica entre a vía do ferrocarril e a SC-20, recuperando unha zona verde que estaba degradada e coa restauración da lagoa de Cornes (145.015 euros), para mellorar a biodiversidade do ecosistema. Os mesmos criterios se empregan para os traballos de recuperación do Xardín Botánico.
Outras actuacións en espazos públicos
Xesús Domínguez referiuse a outras obras en espazos públicos que se están desenvolvendo nos barrios da cidade para avanzar que de forma inminente rematará a construción dunha praciña na rúa dos Loureiros (85.615,32 euros).
Tamén está en execución a mellora da accesibilidade en 14 puntos da cidade, cun orzamento de 237.470,05 euros. Ás localizacións en que xa se remataron os traballos (rúa de Río, Lavadoiro, Avío, Irmandiños e Betanzos), súmase a recén rematada na rúa dos Xasmíns. Actualmente estase traballando en varios puntos das Fontiñas e no cruzamento da rúa Quiroga Palacios coa Costa do Vedor e rematarase a execución co cruzamento da rúa do Hörreo coa de Gómez Ulla. A previsión é que a execución finalice no primeiro mes do ano 2026.
Rehabilitación de edificios
Ademais destas accións para mellorar o espazo público, estanse a desenvolver reformas de importancia en edificios municipais. Citou a rexeneración da impermeabilización da cuberta do CEIP Quiroga Palacios (379.438,39 euros), e destacou outras grandes actuacións como a reforma integral do Pavillón de Santa Isabel (3 millóns), que, entre outras cuestións, será accesible grazas a un novo vestíbulo de acceso. Sobre esta actuación, indicou que os traballos avanzan satisfactoriamente e a previsión do remate é no primeiro trimestre do 2026.
Neste capítulo hai que salientar outros 3,9 millóns de euros en execución na reforma do Pazo de Raxoi, que tamén avanzan segundo as previsións. Este proxecto permite poñer en valor o patrimonio histórico dunha forma que todas as persoas poidan desfrutalo, xa que vai mellorar o acceso aos servizos públicos.
Actualmente, no Pazo de Raxoi estase a executar a base do que será o novo núcleo de comunicacións, cun ascensor e unha escaleira que conectará a planta baixa coas plantas soto. Xa na planta segunda, onde se atopaban as oficinas de urbanismo, estanse levando a cabo traballos de saneado e reforzo da estrutura de madeira existente. A previsión de remate desta obra é para o mes de maio do ano 2026.
