• Os populares esperan con esta moción que se poida converter en “unha ferramenta útil para mozas que buscan a súa primeira oportunidade laboral, persoas que necesitan reciclarse, entidades de barrio que buscan un lugar digno para desenvolver as súas actividades e, en definitiva, un compromiso real co barrio”
• Crespo esixirá no próximo pleno definir o uso futuro da parcela, garantir un calendario de actuacións e financiamento, e recuperala como espazo de oportunidades, priorizando usos ligados á formación en oficios, emprego e actividades sociais que recuperan a esencia da Escola-Taller
O portavoz municipal do Partido Popular de Pontevedra, Rafa Domínguez, e a concelleira Silvia Crespo reuníronse coa nova directiva da Asociación de Veciños Ou Miradoiro, no Centro Cultural de Monte Porreiro, para presentarse e trasladarlles a proposta da formación política para recuperar a parcela de 3.000 metros cadrados da antiga Escola Taller.
O PP de Pontevedra rexistrou este mércores unha moción, que se debaterá no próximo pleno municipal ordinario, para definir o uso futuro da parcela, garantir un calendario con actuacións e financiamento concreta e, o que consideran máis importante, “recuperala como espazo de oportunidades priorizando usos ligados á formación en oficios, o emprego e actividades sociais compatibles, recuperando así a esencia coa que naceu a Escola Taller”, explicou Crespo.
A edil dos populares explicou que “non se trata dunha moción maximalista, senón dunha folla de roteiro realista para primeiro definir o uso, logo dignificar o espazo e finalmente orientalo á formación e a usos sociais que tiña anteriormente ao seu peche”.
Paralelamente, esixiu actuacións urxentes de limpeza, seguridade e mantemento para deter a deterioración do inmoble. “Desde a oposición levamos todo o mandato escoitando anuncios, estudos, ideas a futuro, pero mentres tanto o barrio ve como un dos seus equipamentos máis valiosos degrádase día a día, sen uso definido, sen mantemento adecuado e sen proxecto claro. Non é serio que se tolere a deterioración dun equipamento público mentres se presume de sustentabilidade e de barrios amables”, engadiu.
Para o Partido Popular é “un auténtico sen sentido ter este recurso infrautilizado” e por iso propoñen recuperar un espazo público xa existente, aproveitar a súa localización e a súa historia como Escola Taller para convertelo en “unha ferramenta útil para mozas que buscan a súa primeira oportunidade laboral, persoas que necesitan reciclarse, entidades de barrio que necesitan un lugar digno onde desenvolver a súa actividade e, en definitiva, para comprometerse de verdade con Monte Porreiro, concluíu.
