- O avance do informe estacional de MeteoGalicia conclúe que a temperatura media do período se situou 0,3 graos por riba do agardado nesta época, mentres que as chuvias acumuladas superaron nun 10% os valores climáticos de referencia
- Por meses, novembro foi o que rexistrou máis precipitacións acumuladas, outubro pechouse sendo moi cálido e setembro foi frío e normal en canto a pluviosidade
- Os termómetros marcaron os valores medios máis altos de toda Galicia na zona do Miño de Pontevedra e onde choveu máis foi nas serras litorais da franxa atlántica
Galicia rexistrou un outono climatolóxico cálido en canto ás temperaturas e húmido no que respecta ás precipitacións, un balance no que destaca en especial o comportamento do mes de novembro, que se caracterizou por ser cálido e moi húmido con respecto ao esperado.
Así se conclúe no resumo do informe climatolóxico de MeteoGalicia correspondente ao último trimestre, elaborado a partir dos datos recollidos nas estacións máis representativas da Comunidade e tendo en conta a súa evolución durante o período que se toma como referencia (1981-2010).
En concreto e con relación ás temperaturas, a media do pasado outono situouse por riba do agardado, con 14,8 graos (é dicir, 0,3 graos por riba do habitual nesta época), mentres que as máximas e mínimas tamén foron máis altas do normal, con anomalías positivas de 0,3º e 0,4º, respectivamente.
Desde o punto de vista da pluviosidade, cunha cantidade de precipitación media acumulada de 467 l/m2, un 10% superior ao valor climático do período de referencia, pódese cualificar o outono climatolóxico de 2025 en Galicia como húmido pero sen destacar en especial con respecto ao comportamento da estación nos últimos tres anos.
En canto á análise por meses, os tres períodos analizados tiveron comportamentos bastante diferentes entre si, cun setembro frío e normal no que respecta ás precipitacións rexistradas; un mes de outubro moi cálido (cunha temperatura media 1,7º por riba do habitual) e seco; e un novembro cálido e moi húmido, durante o cal as precipitacións acumuladas superaron en moito os valores normais —debido, fundamentalmente, ao paso pola Comunidade da borrasca Claudia, que entre os días 11 e 16 deixou cantidades de auga excepcionais—.
Por último, a análise do trimestre por áreas xeográficas revela un comportamento dos termómetros con bastantes diferencias segundo as zonas analizadas. Así, os valores máis altos, comprendidos entre 15,6º e 16,6º, rexistráronse, principalmente, na zona do Miño de Pontevedra mentres que os máis baixos, de entre 8,8º e 10,4º, acadáronse no Macizo Central ourensán.
Ademais, as anomalías máis grandes das temperaturas medias con respecto ao período de referencia acadáronse na contorna da Serra do Piornal, cunha anomalía positiva de arredor de 1,5º. Pola contra, os valores máis baixos, déronse en áreas illadas da metade oeste, sobresaíndo a península do Barbanza, con 0,2º menos do valor habitual.
No que respecta á chuvia, Galicia viviu no seu conxunto un trimestre húmido debido ás chuvias xeneralizadas e persistentes de finais de outubro e, especialmente e como xa se indicou, ao mes de novembro, durante o que as precipitacións estiveron por riba dos valores climáticos agardados nesta época do ano.
O reparto das chuvias rexistradas durante todo o trimestre, en todo caso, non tivo un reparto homoxéneo polo territorio. Os valores máis altos, de entre 900 e 1.100 l/m2 —o dobre que a chuvia media acumulada no conxunto da Comunidade— rexistráronse ao longo das Serras Litorais da franxa atlántica. Pola contra, os valores máis baixos —entre 80 e 180 l/m2— rexistráronse na costa central e oriental da Mariña Lucense e nos vales dos ríos Casaio e Sil, na comarca ourensá de Valdeorras.
