O presidente do Inorde, Rosendo Fernández, participou hoxe na entrega destes diplomas, no Museo da Emigración de Quintela, onde puxo en valor o papel do turismo como “ferramenta clave” para afrontar o reto demográfico e xerar novas oportunidades no rural, apostando por unha oferta sostible e de calidade
A Deputación de Ourense, a través do Inorde, fixo entrega hoxe dos distintivos do Sistema Integral de Calidade Turística Española en Destinos correspondentes ao Xeodestino “Terras de Celanova-Serra do Xurés”, incorporándose 9 novos servizos turísticos ao SICTED.
No acto participou o presidente do Inorde, Rosendo Fernández; o alcalde de Quintela de Leirado, José Antonio Pérez; o xefe da área de Turismo da Xunta en Ourense, Cecilio Santalices; e a xerente do Inorde, Emma González.
O presidente do Inorde, Rosendo Fernández, participou hoxe na entrega destes diplomas, no Museo da Emigración de Quintela, onde puxo en valor o papel do turismo como “ferramenta clave” para afrontar o reto demográfico e xerar novas oportunidades no rural, apostando por unha oferta sostible e de calidade.
Así mesmo, Rosendo Fernández agradeceu o “gran traballo e esforzo” das entidades públicas e privadas que realizaran toda a formación para lograr este distintivo que dá “boa conta” da oferta turística de calidade que os turistas poden atopar na provincia de Ourense e, máis concretamente, neste xeodestino, xestionado polo Inorde.
Neste sentido, Rosendo Fernández destacou a crecente incorporación de servizos turísticos en toda a provincia que, conscientes das novas demandas dos viaxeiros, apostan por empregar tempo e traballo para lograr distintivos como o SICTED que acreditan a súa calidade e contribúen a ofrecer un destino sostible e que preserva a súa identidade.
Os 9 servizos distinguidos neste 2025 son: Ana Canal Fraga, guía de turismo de Entrimo; a Casa A. Xanela Azul de Celanova; El Ranchisto Ecuestre de Entrimo; Lirios do Xurés: aventura e natureza de Entrimo; o Museo da Emigración A Guinea de Quintela de Leirado; a Oficina Municipal de Turismo de Celanova; a Reitoral de Ansemil de Celanova; a Riquiña Celanova; e a Xesta Brava de Ramirás.
Con estas novas incorporacións, o xeodestino “Terras de Celanova-Serra do Xurés” conta xa son 21 establecementos distinguidos polo SICTED, converténdose nun exemplo de coordinación e mellora continua para o sector turístico da provincia. Os servizos distinguidos pertencen ata a dez oficios distintos: guías de turismo, vivendas de uso turístico, experiencias e talleres turísticos, turismo activo, museos e centros de interese turístico visitable, oficinas de información turística, aloxamentos rurais, bares e cafeterías, hoteis e apartamentos turísticos e restauración ou empresas turísticas de catering.
Diferentes accións a prol dun destino sostible e de calidade
Este proxecto é froito do traballo de colaboración que existe entre o Inorde, a Axencia de Turismo de Galicia e os quince concellos que integran o xeodestino “Terras de Celanova-Serra do Xurés”.
Ao fío disto, Rosendo Fernández fixo un repaso polas actuacións levadas a cabo ao longo deste ano e que inclúe a presentación das ferramentas dixitais, o monográfico da Revista Turismo Rural que chegará a toda España en xaneiro ou o novo vídeo de turismo familiar que se presentará en Fitur para dar continuidade ás iniciativas de ecoexperiencias que se iniciou o ano pasado.
