• O informe do secretario municipal confirma que o Concello segue acumulando atrasos en licenzas, obras e mantemento
• O PP reclama un plan urxente de reforzo de persoal e unha xestión eficaz que permita recuperar o funcionamento normal do Concello
O Partido Popular de Culleredo advirte de que o informe do secretario municipal, feito público esta semana, non é un simple documento administrativo: retrata o bloqueo que os veciños sofren na súa vida diaria. Licenzas que se demoran durante meses, obras que acumulan atrasos, avarías que non se reparan a tempo, falta sistemática de mantemento e actividades municipais que se aprazan. “Non falamos de casos illados ou puntuais, senón dun Concello atrancado desde hai moito tempo, ao límite”, sinala a portavoz popular, Izaskun García.
García afirma que “Rioboo non está no día a día do Concello”. Esa desconexión, subliña, explica que o alcalde non recoñeza os problemas reais e que non teña capacidade para solucionalos. “Admitir agora a falta de persoal chega tarde, cando os veciños levan meses sufrindo as consecuencias”, afirma a portavoz do PP. “Os veciños merecen un concello que funcione, con servizos accesibles e respostas rápidas. Iso esixe un liderado próximo e comprometido, algo que hoxe non existe”, engade.
A portavoz do PP sostén que a falta de planificación e de recursos humanos xa está a afectar de forma directa á atención á cidadanía, coa deterioración prolongada de servizos básicos e o peche doutros. Neste sentido, lembra clausúraa da oficina de atención telefónica personalizada aos veciños, posta en marcha en xuño pasado e pechada apenas tres meses despois por falta de persoal para atendela, así como o risco de que deixe de funcionar tamén una das dúas oficinas de Rexistro.
Desde o PP de Culleredo sinalan que a responsabilidade política esixe presenza, escoita e solucións concretas, non limitarse a informes técnicos nin a declaracións de boas intencións. Para os populares, o anuncio do goberno local de 7 novas prazas na oferta pública de emprego do 2025 non pode presentarse como a solución inmediata: “Non se pode gobernar desde a distancia nin con escusas. Culleredo necesita un plan real, reforzo de persoal e xestión eficaz, non parches que chegan demasiado tarde”.
